এমাহ পিছত উদ্ধাৰ হ’ল আৰৱ সাগৰত দুৰ্ঘটনাত পতিত হোৱা হেলিকপ্টাৰৰ পাইলটৰ মৃতদেহ
যোৱা ২ ছেপ্টেম্বৰত আৰৱ সাগৰত ভাৰতীয় উপকূল বাহিনীৰ এখন হেলিকপ্টাৰ দুৰ্ঘটনাত পতিত হৈছিল। এই ভয়ংকৰ দুৰ্ঘটনাত ভাৰতীয় উপকূল বাহিনীৰ দুজন পাইলটসহ মুঠ ৩জন লোকৰ মৃত্যু হৈছিল।
সেই ঘটনাৰ প্ৰায় এমাহৰ পাছত অৱশেষত আৰব সাগৰৰ পৰা এজন পাইলটৰ মৃতদেহ উদ্ধাৰ কৰা হয়।
শুকুৰবাৰে এক অধিসূচনা জাৰি কৰি এই তথ্য ৰাজহুৱা কৰিছে ভাৰতীয় উপকূল বাহিনীয়ে।
২ ছেপ্টেম্বৰত গুজৰাট বন্দৰৰ পৰা ৩০ নটিকেল মাইল দূৰত এই দুৰ্ঘটনা সংঘটিত হয়। ভাৰতীয় উপকূলৰক্ষী বাহিনীৰ হেলিকপ্টাৰ ‘ALH Mk-III’ এ তাত এজন আহত ব্যক্তিক উদ্ধাৰ কৰিবলৈ গৈছিল। উদ্ধাৰ অভিযানৰ সময়ত হেলিকপ্টাৰখন দুৰ্ঘটনাৰ সন্মুখীন হয়। তাত থকা ৪ জন ক্ৰুৰ ভিতৰত গৌতম কুমাৰ নামৰ এজনক উদ্ধাৰ কৰা হয় যদিও হেলিকপ্টাৰখনত থকা বাকী তিনিজন লোক নিৰুদ্দেশ হয়।
ঘটনাৰ পিছদিনা এজন পাইলট আৰু এজন ক্ৰু মেম্বাৰক উদ্ধাৰ কৰা হয়। অৱশ্যে বহু দিনৰ অনুসন্ধানৰ অন্ততো হেলিকপ্টাৰখনৰ দ্বিতীয়জন পাইলট পোৱা নগ’ল।
এমাহজোৰা তালাচীৰ অন্তত অৱশেষত উদ্ধাৰ হয় দুৰ্ঘটনাটোত নিৰুদ্দেশ হোৱা শেষ সদস্য ৰাকেশ কুমাৰ ৰানাৰ মৃতদেহ।
পাইলটগৰাকীৰ মৃতদেহ সম্পূৰ্ণ ৰাজ্যিক সন্মানেৰে দাহ কৰা হ’ব বুলি ক’ষ্ট গাৰ্ডে অৱগত কৰিছে। একে সময়তে সেই দুৰ্ঘটনাত শ্বহীদ হোৱা আন দুজন বীৰ জোৱানক শ্ৰদ্ধাঞ্জলি জনোৱা হৈছে।