পৰিত্যক্ত শিশুৰ বাবে আশাৰ ৰেঙণি কঢ়িয়াই আনিছে নাগালেণ্ডৰ ‘ক্ৰেডেল অব হ’প’ প্ৰকল্পই। ১৯ নৱেম্বৰ সোমবাৰে ডিমাপুৰত এই প্ৰকল্পটো আৰম্ভ কৰা হৈছে। সমাজ কল্যাণ বিভাগৰ শিশু কল্যাণ সেৱাৰ অধীনস্থ ‘ক্ৰেডেল অব হ’প’ প্ৰকল্পটো উদ্বোধন কৰিছে সমাজ কল্যাণ বিভাগৰ উপদেষ্টা নোকে ৱাংনাওৱে।
এই প্ৰকল্পটোৰ সৈতে সংগতি ৰাখি ডিমাপুৰৰ আৰক্ষী থানা, চিকিৎসালয়, ৰাজহুৱা জনস্বাস্থ্য কেন্দ্ৰ, অংগনৱাড়ী কেন্দ্ৰ আৰু শিশু যত্ন কেন্দ্ৰকে ধৰি ধৰি ৯০টা গুৰুত্বপূৰ্ণ স্থান চিনাক্ত কৰি এই প্ৰকল্প স্থাপন কৰা হ’ব। এই স্থানসমূহ জিলা শিশু সুৰক্ষা গোট, শিশু কল্যাণ সমিতি আৰু চাইল্ড লাইনৰ সৈতে সংযুক্ত থাকিব আৰু গাঁও/ৱাৰ্ড শিশু সুৰক্ষা সমিতিৰ ওপৰত ন্যস্ত থাকিব।
‘ক্ৰেডেল অব হ’প’ কিছুমান এনে স্থানত স্থাপন কৰা হৈছে যাতে নিজৰ চিনাকী প্ৰকাশ নকৰাকৈ তেওঁৰ পীড়িত শিশুটিক ইয়াত থব পাৰে। এই প্ৰকল্পটোৰ প্ৰধান উদ্দেশ্য হৈছে যাতে পৰিত্যক্ত আৰু অনাকাংক্ষিত কেঁচুৱাক মৰমেৰে ভৰা এখন সঠিক ঘৰ প্ৰদান কৰিব পাৰি। নাগালেণ্ড শিশু সুৰক্ষা সেৱাৰ সঞ্চালক চুবাইনলা জমিৰে কৈছে যে নাগলেণ্ডত যথেষ্ট সংখ্যক শিশুক ড্ৰেইনত, জাবৰ পেলোৱা স্থানত অতি দুখজনক অৱস্থাত পেলাই থৈ যায়।
তেওঁ আৰু কৈছে যে অপৰিকল্পিত গৰ্ভধাৰণ, দাৰিদ্ৰ্যৰ বাবে পিতৃ-মাতৃয়ে সন্তানক ত্যাগ কৰিবলৈ বাধ্য হয় কিন্তু অধিকাংশকেই অতি বেয়া স্থানত পেলাই থোৱা দেখা যায়। ঘাইকৈ শিক্ষাৰ অভাৱ আৰু আইনগতভাৱে সন্তানক সমৰ্পণ কৰি সেই সন্তানৰ উজ্জল ভৱিষ্যত নিশ্চিত কৰাৰ অধিকাৰ সম্পৰ্কে থকা অজ্ঞতাৰ বাবে এনেদৰে নিজৰ সন্তানক ত্যাগ কৰে।
এই প্ৰকল্পটোৱে প্ৰতিখন জিলাত কেন্দ্ৰীয় দত্তক সমল প্ৰাধিকৰণ (Central Adoption Resource Authority অৰ্থাৎ CARA) স্থাপন কৰি বিশেষীকৃত দত্তক এজেঞ্চি (Specialized Adoption Agency অৰ্থাৎ SAA) স্থাপন কৰাৰ সমস্যাও সমাধান কৰিব। এই প্ৰকল্পৰ অধীনত গ্ৰহণ কৰা প্ৰতিটোৱেই শিশু কল্যাণ সমিতিৰ জৰিয়তে শিশু ওচৰৰ বিশেষীকৃত দত্তক এজেঞ্চিৰ সৈতে যুক্ত থাকিব।
এই পাইলট প্ৰজেক্টটো উন্মোচন অনুষ্ঠানৰ সৈতে সংগতি ৰাখি প্ৰডিগালছ’ হোমে (Prodigals’ Home) সংকলিত কৰা গ্ৰন্থ ‘Naga Customary Practices of Child Adoption’ উন্মোচন কৰা হয়। গ্ৰন্থখন উন্মোচন কৰে নোকে ৱাংনাওৱে।
