কাজিৰঙা ৰাষ্ট্ৰীয় উদ্যানৰ হালধিবাৰী এনিমেল কৰিড’ৰৰ ৩৭ নং ৰাষ্ট্ৰীয় পথত এখন তীব্ৰবেগী গাড়ীৰ খুন্দাত এটা গঁড় আহত হয়।
ঘটনাৰ বিৱৰণি মতে আজি সন্ধিয়া হালধিবাৰীৰ এনিমেল কৰিড’ৰত ৰাষ্ট্ৰীয় পথ অতিক্ৰম কৰিবলৈ লোৱা অৱস্থাত উদ্যানখনৰ এটা গঁড়ক এ এছ ০৫ চি ৬৬৮৯ নম্বৰৰ এখন ট্ৰেভেলাৰে প্ৰচণ্ড জোৰত খুন্দা মাৰে। ট্ৰেভেলাৰৰ খু্ন্দাত আঘাতপ্ৰাপ্ত গঁড়টোয়ে কাজিৰঙা ৰাষ্ট্ৰীয় উদ্যানৰ পৰা ৰাষ্ট্ৰীয় পথ অতিক্ৰমী কাৰ্বি আংলং জিলাৰ বনাঞ্চলত প্ৰৱেশ কৰাৰ চেষ্টাৰ কৰা বুলি জানিব পৰা গৈছে।
আনহাতে দুৰ্ঘটনা সংঘটিত কৰা ট্ৰেভেলাৰখনে কলিয়াবৰৰ বাগৰিৰ পৰা বৰযাত্ৰী লৈ গোলাঘাট অভিমুখে গৈ আছিল। ট্ৰেভেলাৰখন ইতিমধ্যে বন বিভাগে জব্দ কৰিছে।
ইফালে আঘাতপ্ৰাপ্ত গঁড়টো বনাঞ্চললৈ সোমাই যায়। পিছত বনকৰ্মীয়ে বিচাৰি উলিয়াই যদিও নিশাৰ অন্ধকাৰত গঁড়টোৰ অৱস্থাৰ বুজ ল’ব পৰা নাই বনকৰ্মীয়ে।
