দেশত এতিয়া কৰ’না আতংক। দৈনিক বৃদ্ধি পাব ধৰিছে কৰ’নাভাইৰাছ সংক্ৰমণৰ সংখ্যা। যাৰ বাবে এতিয়া সমগ্ৰ ভাৰতত চলি আছে লকডাউন। লকডাউনে আজি ১৭ টা দিন অতিক্ৰম কৰিলে।
কিন্তু এই লকডাউনৰ সময়ত দৰিদ্ৰ তথা দিন হাজিৰা কৰি খোৱা লোকসকলৰ মাজত এমুঠি খাদ্যৰ বাবে হাহাকাৰ পৰিস্থিতিৰ সৃষ্টি হৈছে।
এনে এক সময়তে শিৱসাগৰৰ একাংশ সমাজ সচেতন ব্যক্তি ওলাই আহিছে আৰ্তজনৰ কাষলৈ। প্ৰতিগৰাকী দৰিদ্ৰ তথা দিন হাজিৰা কৰি জীৱন নিৰ্ৱাহ কৰা ব্যক্তিক এই মহা সংকটৰ সময়তএমুঠি খাদ্য যোগান ধৰি মানৱতাৰ পৰিচয় দাঙি ধৰিছে।
আজি বুৰঞ্জী প্ৰসিদ্ধ কাথপাৰ গাঁৱৰ কেইগৰাকীমান মহিলা আৰু যুৱক-যুৱতীয়ে নিজা প্ৰচেষ্টাৰে অঞ্চলটোৰ প্ৰায় এশঘৰ মানুহক অত্যাৱশ্যকীয় খাদ্য সামগ্ৰী চাউল, দাইল, আলু, পিয়াজ, মিঠাতেল,নিমখ,মুড়ি আদি বিতৰণ কৰে।
লকডাউনৰ সম্পূৰ্ণ চৰকাৰী নীতি-নিৰ্দেশনা মানি চলি আৰু সামাজিক দূৰত্ব বজাই ৰাখি ঘৰে ঘৰে গৈ আৰ্তজনক অত্যাৱশ্যকীয় সামগ্ৰী বিতৰণ কৰা কাৰ্যক সমগ্ৰ অঞ্চলবাসীয়ে প্ৰশংসা কৰে।
সমাজ সেৱিকা কল্পনা দত্তৰ নেতৃত্বত অঞ্জলি দত্ত, জেনালী গগৈ, বিদ্যাৱতী বৰুৱা, সোমেন দুৱৰা আৰু অভিনৱ দত্তৰ ব্যক্তিগত প্ৰচেষ্টাত এই মহান কাৰ্য কৰা হয়।
অনাগত দিনত অঞ্চলটোৰ প্ৰায় তিনিশ ঘৰ পৰিয়ালক তেওঁলোকে সাহায্য প্ৰদান কৰিব বুলি জানিবলৈ দিয়ে।
ইফালে বিত্ত তথা স্বাস্থ্য মন্ত্ৰীৰ আহ্বানৰ প্ৰতি লক্ষ্য ৰাখি শিৱসাগৰ অসামৰিক চিকিৎসালয়ৰ ষ্টাৰ্ফ নাৰ্চ গীতুমণি হাজৰিকাই নিজ অঞ্চল জয়সাগৰৰ পাঁচটা পৰিয়ালৰ মাজত খাদ্য সামগ্ৰী বিতৰণ কৰে।
উল্লেখ্য যে বিত্ত তথা স্বাস্থ্য মন্ত্ৰী হিমন্ত বিশ্ব শৰ্মাই প্ৰতিজন চৰকাৰী চাকৰিয়ালক নিজ নিজ অঞ্চলৰ পাঁচটা দুখীয়া পৰিয়ালক সহায় কৰিবলৈ আহ্বান জনাইছিল।মন্ত্ৰীজনৰ এই আহ্বানক প্ৰায় সংখ্যক কৰ্মচাৰীয়ে আখৰে আখৰে পালন কৰা দেখা গৈছে।
আনহাতে, আমগুৰিৰ বৰাহীবাৰী ৰঙালী বিহু উদযাপন সমিতিয়ে বৰাহীবাৰী গাঁও পঞ্চায়তৰ প্ৰায় ১৪৫ টা দিন হাজিৰা কৰি জীৱন নিৰ্বাহ কৰা ১৪৫ টা পৰিয়ালৰ মাজত অত্যাৱশ্যকীয় খাদ্য সামগ্ৰী বিতৰণ কৰে। এই কাৰ্যত হালোৱাটিং থানাৰ ভাৰপ্ৰাপ্ত আৰক্ষী বিষয়াৰ লগতে আন আন আৰক্ষীয়েও সহযোগ কৰে।
জিলাখনৰ বিভিন্ন ব্যক্তিয়ে জিলা উপায়ুক্তৰ জড়িয়তে মুখ্য মন্ত্ৰী আৰোগ্য নিধিলৈ বৰঙণি আগবঢ়াইছে। জিলা খনৰ যুৱ ব্যৱসায়ী হৰিপ্ৰশন্ন হাজৰিকাই ১ লাখ টকা, পুলিন গায়নে ১ লাখ টকা, ৰাজভূষণ গগৈয়ে ৫০০০০ টকা, প্ৰসেনজিত বৰুৱাই ৫০০০ টকাৰ বৰঙণি আগবঢ়াই মহানুভৱতাৰ পৰিচয় দাঙি ধৰে।
