গৰু বিহুৰ দিনা আৰ্তজনৰ কাষত থিয় হ’ল ছাত্র নেতা আৰু তেওঁৰ পত্নী
অসম আৰু অসমীয়াৰ স্বাভিমান এই ৰঙালী বিহুৰ উচাহ উদ্দীপনা লকডাউনৰ বাবে ম্লান পৰিছে। তদুপৰি লকডাউনৰ সময়ত একাংশ লোক তথা পৰিয়াল আৰ্থিক সংকটত ককবকাই থকাও পৰিলক্ষিত হৈছে।
লকডাউনৰ বাবে কৰ্মহীন হৈ পৰা বহু শ্ৰমিকৰ পৰিয়ালৰ আখলত জ্বলা নাই জুই। ইয়াৰ মাজতেই ছাত্র নেতা তথা যুৱ ব্যৱসায়ী নয়ন তালুকদাৰ আৰু তেওঁৰ পত্নী মিনাক্ষী তালুকদাৰে আজি তামুলপুৰ মহকুমাৰ লাচী গাঁৱৰ ৰাজহুৱা নামঘৰত উপস্থিত হৈ প্ৰায় শতাধিক সংকটাপন্ন পৰিয়ালৰ মাজত খাদ্য সামগ্ৰী বিতৰণ কৰি সহায়ৰ হাত আগবঢ়ায়।
ইতিমধ্যে নয়ন আৰু তেওঁৰ পত্নী মিনাক্ষীয়ে দ্বাৰকুচি, কেকেৰিকুচি, গোপালপুৰ আদিকে ধৰি বিভিন্ন গাঁৱৰ পাঁচ শতাধিক পৰিয়ালৰ মাজত খাদ্য সামগ্ৰী বিতৰণ কৰে।
অনাগত দিনত মুঠ এক হাজাৰ পৰিয়ালৰ মাজত খাদ্য সামগ্ৰী বিতৰণ কৰাৰ কথা সদৰী কৰে দম্পতি হালে।
আজি বিহুৰ দিনাখন আৰ্তজনৰ ওচৰত থিয় দি সহায়ৰ হাত আগবঢ়াবলৈ পাই আনন্দিত হৈ পৰে নয়ন আৰু তেওঁৰ পত্নী মিনাক্ষী। ইফালে দুয়োজনৰ এই পদক্ষেপক সকলোৱে শলাগ লয়।