পুনৰ এবাৰ অসম আৰক্ষীক দুৰ্বল বুলি প্ৰমাণ কৰি আৰক্ষীৰ জিম্মাৰ পৰাই পলাই যাবলৈ সক্ষম হ’ল এজন আটকাধীন অবৈধ বাংলাদেশী নাগৰিক। বঙাইগাঁও জিলাৰ মানিকপুৰ থানাৰ সীমান্ত আৰক্ষীৰ কৱলৰ পৰা এইদৰে এজন বাংলাদেশীয়ে পলায়ন কৰা ঘটনাই এতিয়া অঞ্চলজুৰি তীব্ৰ প্ৰতিক্ৰিয়াৰ সৃষ্টি কৰিছে।
জানিব পৰা মতে সোমবাৰে মানিকপুৰ থানাৰ সীমান্ত আৰক্ষীয়ে জিলাখনৰ মানিকপুৰ থানাৰ অন্তৰ্গত ২ নং দেওটাৰীৰ পৰা এজন সন্দেহযুক্ত বাংলাদেশী নাগৰিকক আটক কৰিছিল। লোকজনৰ নাম জয়নাল আব্দিন।
আটকাধীন লোকজনক পাছত সীমান্ত আৰক্ষী কনিষ্টবল শ্ৰীমল ৰায় আৰু হাবিলদাৰ ছাহেব আলীৰ দায়িত্বত ওচৰৰে মানিকপুৰ মহাত্মা গান্ধী আদৰ্শ চিকিৎসালয়লৈ স্বাস্থ্য পৰীক্ষাৰ বাবে প্ৰেৰণ কৰে। কিন্তু সন্দেহযুক্ত বাংলাদেশীজনে চিকিৎসালয়ত হোৱা ভিৰৰ সুবিধা লৈ আৰক্ষীৰ চকুত ধূলি দি পলায়ন কৰে।
এই ঘটনা সংঘটিত হোৱাৰ পিছতে সাংবাদিকৰ দলে ঘটনা সন্দৰ্ভত জানিব বিচৰাত কনিষ্টবল শ্ৰীমল ৰায় আৰু হাবিলদাৰ ছাহেব আলীয়ে কোনো মন্তব্য প্ৰকাশ নকৰিলে।
ইফালে আৰক্ষীৰ কৱলৰ পৰা বাংলাদেশী নাগৰিকজনে পলাই যোৱা কাৰ্যক সচেতন লোকে গৰিহনা দিয়াৰ উপৰি একাংশই এয়া আৰক্ষীৰ চৰম গাফিলতিৰ বাবেই এই ধৰণৰ ঘটনা সংঘটিত হোৱা বুলি অভিযোগ উত্থাপন কৰিছে।
