১৭ আগষ্টৰ নিশা কলিয়াবৰৰ ৩৭ নং ৰাষ্ট্ৰীয় ঘাইপথত গাড়ী চোৰে পিষ্টল দেখুৱাই অপহৰণ কৰি নিলে এখন চাহপাত ভৰ্তি টাটা ম’বাইল বাহন।
মিছা আৰক্ষীয়ে দিয়া বিৱৰণি মতে, নিশা প্ৰায় ১.৩০ বজাত কলিয়াবৰৰ বৰভগীয়া চাৰিআলিত দুৰ্বৃত্তই চালকক মাৰধৰ কৰি AS 03 BC 6300 নম্বৰৰ চাহপাত ভৰ্তি টাটা ম’বাইল বাহনখন অপহৰণ কৰি লৈ যায়।
ঘটনাৰ খবৰ পোৱাৰ লগে লগে মিছা আৰক্ষীয়ে সকলো থানালৈ খবৰ পঠিয়ায়। কলিয়াবৰ আৰু মিছা আৰক্ষীয়ে পুৱাৰ পৰাই ঘটনাটোৰ তদন্ত অব্যাহত ৰাখিছে যদিও এই পৰ্য্যন্ত অপহৰণকাৰী বা চুৰি হোৱা গাড়ী কোনোটোৰ শুংসূত্ৰ লাভ কৰা নাই।
আৰক্ষীৰ সূত্ৰটোৱে জনোৱামতে, টাটা ম’বাইলখনে তিতাবৰৰ পৰা গুৱাহাটী অভিমুখে চাহপাত কঢ়িয়াই আনিছিল। আৰক্ষীয়ে বাহনখনৰ চালক ধ্ৰুৱ কছাৰী আৰু প্ৰণৱ গগৈক আহত অৱস্থাত উদ্ধাৰ কৰিছে।
আনহাতে মিছা আৰক্ষীৰ পৰা খবৰ পাই ৰূপহী আৰক্ষীয়েও অভিযান চলাওঁতে অভিযানৰ সময়ত এখন ধাননি পথাৰত পৰিত্যক্ত অৱস্থাত ২৪বেগ চাহপাত উদ্ধাৰ কৰিছে। এই উদ্ধাৰ হোৱা চাহপাতৰ বস্তাসমূহ চুৰি হোৱা গাড়ীখনৰে হয় বুলি আৰক্ষীৰ তদন্তৰ সময়ত জানিব পাৰিছে। কিন্তু গাড়ীখনত মুঠ ৪৫ বেগ চাহপাত আছিল বুলি চালক-হেণ্ডিমেনে জানিবলৈ দিয়ে।
শেহতীয়া খবৰ মতে, মিছা আৰক্ষীয়ে এজন লোকক সন্দেহবশতঃ সোধা-পোছাৰ বাবে আটক কৰিছে। গাড়ী চোৰৰ দলটোৰ সন্ধান এতিয়াও অব্যাহত আছে বুলি মিছা আৰক্ষীয়ে জানিবলৈ দিয়ে।
