তিনিচুকীয়া জিলাৰ কাকপথাৰৰ বৰাচুক গাঁৱৰ পবিত্ৰ বৰাৰ ১৬ বছৰীয়া কিশোৰী বৰষা বৰা যোৱা ১৫ জুলাইৰ পৰা নিৰুদ্দেশ হৈ আছে।
অৰুণাচল প্ৰদেশৰ ৰাজধানী ইটানগৰৰ পৰা কিশোৰীগৰৰাকী নিৰুদ্দিষ্ট হোৱাৰ ঘটনাই তীব্ৰ চাঞ্চল্যৰ সৃষ্টি কৰিছে।
জানিব পৰা মতে, বৰষা বৰা নামৰ কিশোৰী গৰাকীক ৪ বছৰ পূৰ্বে পবিত্ৰ বৰাই আৰ্থিক সংকটত ভূগি গাঁৱৰ মনো নামৰ এজন লোকৰ প্ৰৰোচনাত পৰি অৰুণাচলৰ ইটানগৰৰ দীফু নামৰ এজন জনজাতীয় লোকৰ ঘৰত ঘৰুৱা কাম কাজ হেতু থাকিবলৈ দিয়ে।
যোৱা ১৫ জুলাইৰ ৰাতিপুৱা ইটানগৰৰ সেই ঘৰটোত কোনো নথকা অৱস্থাত বৰষাই ঘৰৰ পৰা ওলাই যায়।
উক্ত পৰিয়ালটোৱে বিচাৰ খোচাৰ কৰি বৰষাৰ কোনো সন্ধান লাভ নকৰাত স্থানীয় ইটানগৰ আৰক্ষীক অৱগত কৰে।
ইটানগৰ আৰক্ষীয়ে ইতিমধ্যে সীমান্তৰ অসম আৰক্ষীৰ সৈতে যোগাযোগ কৰি নিৰুদ্দিষ্ট কিশোৰীৰ সন্ধানত নামি পৰিছে।
ইপিনে, কিশোৰীগৰাকীৰ পিতৃ পবিত্ৰ বৰাই যোৱা ১৯টা দিন অতিক্ৰম কৰাৰ পাছত আজিহে কাকপথাৰ আৰক্ষীক এখন এজাহাৰ দাখিল কৰে।
এই সন্দৰ্ভত কাকপথাৰ আৰক্ষীয়ে অৰুণাচল প্ৰদেশ আৰক্ষীৰ সৈতে লগে লগে যোগাযোগ কৰা বুলি জানিব পৰা গৈছে।
আনহাতে, এক নিৰ্ভৰযোগ্য সূত্ৰ মতে কিশোৰীগৰাকী সম্প্ৰতি লখিমপুৰ হাৰমতিৰ জনৈক ৰাভা নামৰ এগৰাকী মহিলাৰ ঘৰত থকা বুলি জানিব পৰা গৈছে।
