বৈষ্ণো দেৱী ভ্ৰমণৰ পাছত ঘূৰি অহাৰ পথত জম্মু-কাশ্মীৰত ভয়ংকৰ বাছ দুৰ্ঘটনা! ১জনৰ মৃত্যু, আহত ১৭ জন

জম্মু-কাশ্মীৰত সংঘটিত হৈছে এক মৰ্মান্তিক বাছ দুৰ্ঘটনা। শনিবাৰে সন্ধিয়া বৈষ্ণো দেৱী মন্দিৰৰ পৰা উভতি আহোঁতে সংঘটিত হয় এই দুৰ্ঘটনা। নিয়ন্ত্ৰণ হেৰুৱাই প্ৰায় ৩০ ফুট দ খাৱৈত বাগৰি পৰে বাছখন। এই দুৰ্ঘটনাত বাছ চালকজন নিহত হোৱাৰ লগতে ১৭ জন তীৰ্থযাত্ৰী আহত হয়।

জম্মু বাছ ষ্টেণ্ডৰ পৰা মাত্ৰ ৮ কিলোমিটাৰ দূৰত্বত থকা মাণ্ডা অঞ্চলত সংঘটিত হয় এই দুৰ্ঘটনা। প্ৰত্যক্ষদৰ্শীৰ মতে, বাছখনৰ বাছখনৰ ওপৰত হঠাৎ নিয়ন্ত্ৰণ হেৰুৱাই পেলায় চালকজনে। নিমিষতে বাছখন এটা দ খাৱৈত পৰিল। দুৰ্ঘটনাৰ খবৰ পোৱাৰ পাছতে জম্মু আৰক্ষী আৰু দুৰ্যোগ সঁহাৰি বাহিনীয়ে ক্ষীপ্ৰতাৰে সেই স্থানত উপস্থিত হয়। আহতসকলক উদ্ধাৰ কৰি লগে লগে জম্মুৰ চৰকাৰী চিকিৎসা মহাবিদ্যালয় হাস্পতালত ভৰ্তি কৰোৱা হয়। চিকিৎসকে জনোৱা মতে, বৰ্তমান আটাইকেইজন আহতসকলৰ অৱস্থা সুস্থিৰ।

আৰক্ষী সূত্ৰৰ পৰা জানিব পৰা মতে, প্ৰায় এঘণ্টা ধৰি তালাচী চলাই মৃত চালকজনৰ মৃতদেহ উদ্ধাৰ কৰে। নাম ৰাকেশ, হিমাচল প্ৰদেশৰ বাসিন্দা।

জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই এই দুৰ্ঘটনাক লৈ গভীৰ শোক প্ৰকাশ কৰে।

এই ঘটনাক লৈ শোক প্ৰকাশ কৰিছে উপ-ৰাজ্যপাল মনোজ সিনহাই। আহতসকলৰ চিকিৎসাৰ বাবে প্ৰশাসনে সকলো ধৰণৰ সহায়ৰ আশ্বাস দিছে।