ৰাজ্যত অস্বাভাৱিক হাৰত ক’ৰ’না আক্ৰান্তৰ সংখ্যা বৃদ্ধি পালেও তাৰ মাজতে কিছু সংখ্যক ৰোগী চিকিৎসাৰ অন্তত সুস্থ হৈ উঠাৰ বাতৰিয়ে জনসাধাৰণক মানসিকভাৱে সকাহ দিয়া পৰিলক্ষিত হৈছে।
আজি কিছু সময় পূৰ্বে ৰাজ্যৰ বিভিন্ন চিকিৎসালয়ৰ পৰা মুঠ ৬৬৬ গৰাকী ক’ৰ’না আক্ৰান্তক আৰোগ্য লাভ কৰাৰ পাছত মুক্তি দিয়া হয়।
ইয়াৰ ফলত ৰাজ্যত বৰ্তমানলৈ ক’ৰ’নাৰ পৰা আৰোগ্য লাভ কৰা লোকৰ সংখ্যা ১৩৫৫৪ গৰাকীলৈ বৃদ্ধি পালে।
অসমত এতিয়াও বিভিন্ন চিকিৎসালয়ত মুঠ ৬১৪৭ গৰাকী ক’ৰ’না আক্ৰান্ত ৰোগী চিকিৎসাধীন হৈ আছে।
আনহাতে, অসমত মুঠ ১৯,৭৫৪ গৰাকী লোক ক’ৰ’না ভাইৰাছৰ দ্বাৰা সংক্ৰমিত হৈছে।
উল্লেখযোগ্য যে, ৰাজ্যত আজি ক’ৰ’নাৰ সংক্ৰমণৰ ফলত প্ৰাণ হেৰুওৱা লোকৰ সংখ্যাই ৫০ৰ ঘৰ স্পৰ্শ কৰিছে।
আজি বাগছা জিলাৰ বিদুল আহমেদ(৫০) আৰু কামৰূপ মহানগৰ জিলাৰ উপেন চন্দ্ৰ শৰ্মা(৬৩) নামৰ দুগৰাকী লোকৰ ক’ৰ’নাৰ সংক্ৰমণৰ ফলত মৃত্যু হয়।
স্বাস্থ্য মন্ত্ৰী হিমন্ত বিশ্ব শৰ্মাই টুইটাৰ যোগে এই কথা প্ৰকাশ কৰি ক’ৰ’নাৰ সংক্ৰমণৰ ফলত মৃত্যু হোৱা দুয়োগৰাকী লোকৰ পৰিয়ালবৰ্গলৈ সমবেদনা জ্ঞাপন কৰে।
