আৰক্ষী থানা বা আৰক্ষী চকী বুলি কলে তালৈ যাবলৈ সকলোৱে এবাৰ ভাবিব লগা হয়। কিয়নো প্ৰায় ক্ষেত্ৰত অপৰাধীহে আৰক্ষী চকীলৈ যায় বুলি মানুহৰ মনত ধাৰণ শিপাই আছে।
কিন্তু আমি এখন আৰক্ষী চকীৰ কথা ক’বলৈ বিচাৰিছো যিখন আৰক্ষী চকী দেখিলে আপুনিও হয়তো এবাৰ তালৈ যাবলৈ আগ্ৰহী হৈ পৰিব।
আৰক্ষী চকীখনলৈ আহি আপোনাৰ মন ভৰি পৰিব অনাবিল আনন্দ আৰু শান্তিৰে ।আৰক্ষী চকীখনে মনপ্ৰাণ হৰি এক অনাবিল আনন্দ দিয়ে চকীখনলৈ অহা প্ৰতিজন ব্যক্তিৰে।
বাক্সা জিলাৰ তামুলপুৰ মহকুমাৰ এখন ব্যতিক্ৰমী আৰক্ষী চকী ৷ আৰক্ষী চকীখন আছে অসম-ভূটান সীমান্তৰ দৰঙামেলাত। নাম দৰঙামেলা আৰক্ষী চকী ৷
ভাৰত – ভূটান সীমান্তৰ ভূটান ৰাষ্ট্ৰৰ ছানদ্ৰুপ ঝংখাৰ জিলাৰ গাতেই লাগি থকা এইখন শ বছৰীয়া পুৰণি আৰক্ষী চকী । এতিয়া উতলা ফাগুন। মন প্ৰাণ উচতন।
চৌদিশে তেজৰঙা শিমলু ফুলিছে। বলিছে ফাগুনৰ বলিয়া বা ৷
মদাৰ শিমলু ফুলৰ সুবাসত প্ৰকৃতি হৈ পৰিছে গাভৰু।
এই একেই সময়তে দৰংঙামেলা আৰক্ষী চকীৰ চৌহদটোও যেন হৈ পৰিছে চঞ্চলা।
আৰক্ষী চকীখন কোনে বাৰু সজালে ইমান ধুনীয়াকৈ? ইয়াৰ আঁৰৰ ব্যক্তিজন বাৰু কোন সকলোৰে জানিবলৈ মন গৈছে নিশ্চয়।
জনসাধাৰণক সেৱা কৰি থকাৰ সমান্তৰালভাৱে ভূটান সীমন্তৱৰ্তী গুৰুত্বপূৰ্ণ দৰঙামেলা আৰক্ষী চকীখনৰ দায়িত্বত থকা ভাৰপ্ৰাপ্ত বিষয়া দেৰচুং নাৰ্জাৰী।
নাৰ্জাৰীৰ সৌন্দৰ্য পিপাসু মনৰ বাবেই আজি সুন্দৰকৈ গঢ় লৈ উঠিছে এখন ফুলনি ।
ফুলনিখন সজাই তোলাত সহায় কৰিছে সহকৰ্মী আৰক্ষী সকলে।
আজি দুবছৰ ধৰি আৰক্ষী চকীৰ চৌহদটোত নানাৰঙী ফুল ৰোপন কৰি চৌহদটোক পৰ্যবসিত কৰিছে এখন বাগিচালৈ ৷ ঘটিছে অপৰূপ সৌন্দৰ্যৰ সমাহাৰ।আজি বটাৰুৱাৰো আকৰ্ষণৰ কেন্দ্ৰবিন্দু হৈ পৰিছে দৰঙামেলা আৰক্ষী চকী।
আৰক্ষী চকীলৈ অভিযোগ লৈ অহা অঞ্চলটোৰ জনসাধাৰণ তথা অপৰাধীসকলো আপ্লুত হৈ পৰে এই ফুলনি বাগিচা খন দেখি।
আৰক্ষী চকীখনৰ চৌহদত থকা নানাৰঙী ফুলৰ নান্দনিক দৃশ্যই মনপ্ৰাণ হৰি এক অনাবিল আনন্দ দিয়ে চকীখনলৈ অহা প্ৰতিজন ব্যক্তিক।
দৰংঙামেলা আৰক্ষী চকীৰ ভাৰপ্ৰাপ্ত বিষয়া নাৰ্জাৰীৰ অক্লান্ত পৰিশ্ৰম আৰু প্ৰতিগৰাকী কনিষ্টবল আৰু হোমগাৰ্ডৰ প্ৰচেষ্টাত আৰক্ষী চকীখনৰ চৌহদত এনেদৰে ঠন ধৰি উঠিছে নানাৰঙী ফুলে ৷ডালিয়া, নাৰ্জিকে ধৰি নানাৰঙী ফুলে হাতবাউল দি মাতে বাটৰুৱাক ৷
আৰক্ষী চকীখনৰ ভাৰপ্ৰাপ্ত বিষয়া দেৰচুং নাৰ্জাৰীৰ ভাষাত আৰক্ষী সকলো সৌন্দৰ্যৰ পূজাৰী ৷
জনসাধাৰণে আৰক্ষীৰ লোকক কঠোৰ বুলি ভাবিলেও আচলতে আৰক্ষীৰ লোক সকলৰো এটা সুন্দৰ মন আছে ৷
ৰাজ্যখনৰ প্ৰতি খন আৰক্ষী থানা বা আৰক্ষী চকীত একোখন ফুলনি স্থাপন কৰিবলৈও তেওঁ আহ্বান জনায় ৷
আৰক্ষী বিষয়াগৰাকীৰ ভাষাত ফুলনি দেখিলেই যেন থানাত প্ৰৱেশ কৰা প্ৰতিজন ব্যক্তিৰ মনলৈ শান্তি আহে ৷
দৰংঙামেলা আৰক্ষী চকীত এনেদৰে এখন ফুলনি গঢ়ি তোলা কাৰ্যক স্থানীয় লোকেও প্ৰশংসা কৰিছে ৷
