দিল্লীৰ নৃশংস শ্ৰদ্ধা ৱাকাৰ হত্যাকাণ্ডৰ আন এক চাঞ্চল্যকৰ খবৰ পোহৰলৈ আহিছে। এই বৰ্বৰ হত্যাকাণ্ডৰ গোচৰৰ ৬৬০০ পৃষ্ঠাৰ চাৰ্জশ্বীটত দিল্লী আৰক্ষীয়ে এক ভয়ংকৰ দাবী সন্নিৱিষ্ট কৰিছে। দিল্লী আৰক্ষীৰ মতে হত্যাত অভিযুক্ত লিভ-ইন সংগী আফতাব পুনাৱালাই শ্ৰদ্ধা ৱাকাৰৰ দেহ ৩৫ টুকুৰাকৈ কটাৰ লগতে দেহৰ হাড় মিক্সাৰত গুড়ি পেলাই দিছিল।
দিল্লী আৰক্ষীয়ে চাৰ্জশ্বীটত উল্লেখ কৰা মতে ১৮ মে’ত শ্ৰদ্ধাক এনে নাৰকীয়ভাৱে হত্যা কৰাৰ পিছত পুনাৱালাই খাদ্যৰ অনলাইন ডেলিভাৰী কৰা চাইট জ’মাট’ৰ পৰা চিকেন ৰোল অৰ্ডাৰ কৰি আনি ভোজনো কৰিছিল।
চাৰ্জশ্বীটত আৰক্ষীয়ে উল্লেখ কৰা মতে, আফতাবে প্ৰথমে মৃতদেহটো প্লাষ্টিকৰ বেগত ভৰাই পেলাই দিয়াৰ কথা চিন্তা কৰিছিল। এই পৰিকল্পনা অনুসৰিয়েই তেওঁ আনকি এটা বেগো কিনি আনিছিল। কিন্তু ধৰা পৰিব বুলি ভাবি সেই পৰিকল্পনা বাদ দিছিল।
ইয়াৰ পিছতে আফতাবে শ্ৰদ্ধাৰ মৃতদেহটো কাটি পেলোৱাৰ সিদ্ধান্ত লয় আৰু দোকানৰ পৰা কটাৰী, হাতুৰী আৰু তিনিখন দা ক্ৰয় কৰে। তাৰ পিছতে মৃতদেহটো ৩৫ টুকুৰা কৰি কাটি ফ্ৰীজত ভৰাই থয় আফতাবে।
আনহাতে যেতিয়াই তেওঁৰ কোনো ব্যক্তি তেওঁৰ বাসস্থান ভ্ৰমণ কৰিবলৈ আহিছিল তেতিয়াই পুনাৱালাই ফ্ৰীজৰ পৰা দেহৰ কটা টুকুৰাবোৰ উলিয়াই পাকঘৰত ৰাখিছিল বুলিও চাৰ্জশ্বীটত প্ৰকাশ কৰা হৈছে।
আনহাতে শ্ৰদ্ধাৰ মোবাইল ফোনটো কেইবাদিন ধৰি নিজৰ সৈতে ৰাখিছিল পুনাৱালাই। গুগলৰ তথ্য অনুসৰি ১৮ মে’ৰ পিছত শ্ৰদ্ধাৰ একাউণ্ট তেওঁৰ ফোনটোৰ পৰা চলি আছিল।চাৰ্জশ্বীটত উল্লেখ কৰা মতে পিছত আফতাবে তেওঁৰ সৈতে থকা শ্ৰদ্ধাৰ লিপষ্টিক আৰু ফোনটো মুম্বাইত পেলাই দিছিল।
ইতিমধ্যে শ্ৰদ্ধাৰ মৃতদেহৰ প্ৰায় ২০ টা কটা টুকুৰা উদ্ধাৰ কৰিছে আৰক্ষীয়ে। অৱশ্যে এইপৰ্যন্ত উদ্ধাৰ হোৱা নাই কটা মূৰটো।
যোৱা বছৰৰ শেষৰ ফালে হোৱা পলিগ্ৰাফ আৰু নাৰ্কো-এনালাইছিছ পৰীক্ষাত আফতাব পুনাৱালাই হত্যাকাণ্ডৰ কথা স্বীকাৰ কৰা বুলি আৰক্ষীয়ে সদৰী কৰিছে। এই নৃশংস হত্যাকাণ্ডৰ বাবে তেওঁ অনুশোচনা অনুভৱ কৰা বুলিও চাৰ্জশ্বীটত দাবী কৰা হৈছে।
