সৰ্বভাৰতীয় পৰ্যায়ত বিজেপিক ৰুধিবলৈ আন্তঃৰাষ্ট্ৰীয় হিন্দু পৰিষদৰ সমৰ্থনত অতি শীঘ্ৰে এটা নতুন ৰাজনৈতিক দলৰ আত্মপ্ৰকাশ ঘটিব। ৭ জানুৱাৰি অৰ্থাৎ সোমবাৰে গুৱাহাটী প্ৰেছ ক্লাৱত আয়োজিত এক সংবাদমেলত এই কথা জনায় আন্ত:ৰাষ্ট্ৰীয় হিন্দু পৰিষদৰ উত্তৰ-পূৱ প্ৰান্ত, অসম শাখাৰ সাধাৰণ সম্পাদক ৰবীন চন্দ্ৰ ভূঞাই।
ইয়াৰ উপৰি নতুনকৈ জন্ম হ’বলগীয়া দলটোৰ অহা ৯ ফেব্ৰুৱাৰীত নতুন দিল্লীত নামকৰণ হ’ব বুলিও সংবাদমেল যোগে ভূঞাই জানিবলৈ দিয়ে।
এই ৰাজনৈতিক দলটোৱে আগন্তুক লোকসভা নিৰ্বাচনত নিজাববীয়াকৈ প্ৰাৰ্থী থিয় কৰাব বুলি জানিবলৈ দি কয়, ‘অসমতো ১৪ টা লোকসভা সমষ্টিত এই দলৰ পৰা প্ৰাৰ্থিত্ব প্ৰদান কৰিব।‘
‘বিজেপি দলটোক বহু আশাৰে আমি শাসনলৈ আনিছিলো। ৰাম মন্দিৰ নিৰ্মাণ কৰাৰ আশা দিছিল, বাংলাদেশীক খেদোৱাৰ প্ৰতিশ্ৰুতি দিছিল, সীমা চীল কৰা হ’ব, কাশ্মীৰৰ সমস্যা সমাধান কৰা হ’ব, ইত্যাদি বহু প্ৰতিশ্ৰুতি দিছিল। কিন্তু প্ৰতিশ্ৰুতি প্ৰতিশ্ৰুতিয়েই হৈ থাকিল।‘ এইদৰে আক্ষেপ কৰে ভূঞাই।
তদুপৰি, মোদী আৰু অমিত শ্বাহৰ নেতৃত্বত তথা তেওঁলোকৰ কথা মতেই শাসন চলি আছে বুলি কটাক্ষ কৰি ভূঞাই কয় ‘এইখন এখন গুজৰাটী চৰকাৰ হৈ পৰিছে। তেওঁলোকে নিজৰ মন মৰ্জি মতে চৰকাৰখন চলাই আছে।‘
ইফালে কালিৰ এই সংবাদমেলতে সংগঠনটোৱে নাগৰিকত্ব সংশোধনী বিধেয়ক সন্দৰ্ভতো স্পষ্ট ৰূপত নিজৰ মত প্ৰকাশ কৰে। এই সন্দৰ্ভত সাধাৰণ সম্পাদকগৰাকীয়ে কেন্দ্ৰীয় চৰকাৰৰ প্ৰতি আহ্বান জনায় কয়, ‘অসমত এটাও হিন্দু বাংলাদেশী সংস্থাপন দিয়া নহ’ব, অসমক বাদ দি প্ৰযোজ্য কৰক নাগৰিকত্ব সংশোধনী বিধেয়ক।‘
তেওঁ স্পষ্টকে কয় যে অসমে ১৯৫১ৰ পৰা ১৯৭১ৰলৈকে লক্ষ-লক্ষ বিদেশীৰ বোজা ইতিমধ্যে ল’লে, গতিকে ভাৰতবৰ্ষৰ অন্য হিন্দু সংখ্যালঘু প্ৰান্তত নিৰ্য্যাতিত লোকসকলক সংস্থাপনৰ ব্যৱস্থা কৰিব লাগে।
ইয়াৰ উপৰি তেওঁ আৰু কয় ‘বিলখন গৃহীত কৰি লোকসকলক সংস্থাপন দিলেই নহ’ব, প্ৰথমে সেই লোকসকলৰ বাবে ১০ হাজাৰ কোটি টকা এটা পেকেজ ঘোষণা কৰি লওঁক।‘
আনহাতে, সংগঠনটোৰ সাধাৰণ সম্পাদকগৰাকীয়ে কেৰেলা নাইবা মোদীৰ গুজৰাটতে ‘হিন্দু’ লোকসকলক সংস্থাপন দিয়াৰ বাবে দাবী জনায় কয় ‘পাকিস্তান, আফগানিস্তান আদিত নিৰ্য্যাতিতসকল ভাৰতলৈ নাহি ক’লৈ যাব? গতিকে অসমক বাদ দি সেই লোকসকলক অন্য ৰাজ্যত সংস্থাপন দিবই লাগিব।‘
ইপিনে, আন্তঃৰাষ্ট্ৰীয় হিন্দু পৰিষদৰ সভাপতি প্ৰবীণ ভাই টোগাৰিয়াৰো সেই একেখিনি দাবীয়েই বুলি সংবাদমেলযোগে স্পষ্ট কৰে ভূঞাই।
