মহানগৰীত আইন শৃংখলা জনিত ঘটনা দিনকদিনে বৃদ্ধি পাইছে৷ এটাৰ পিছত আনটো ভয়াবহ ঘটনাই জোঁকাৰি গৈছে মহানগৰবাসীক৷
বিজেপিৰ আমোলত আইন শৃংখলা পৰিস্থিতিৰ ভয়াবহতাকলৈ গৰজি উঠিছে আম আদমি পাৰ্টী৷ মঙলবাৰে সংবাদমাধ্যমলৈ প্ৰেৰণ কৰা এক প্ৰেছ বিজ্ঞপ্তিৰ জৰিয়তে আপ অসমৰ ভাৰপ্ৰাপ্ত সভাপতি ডা° ভবেন চৌধুৰীয়ে কয় যে খিলঞ্জীয়াৰ সুৰক্ষাৰ প্ৰতিশ্ৰুতি দিয়া বিজেপিৰ চৰকাৰ এতিয়া ব্যস্ত অসমীয়াক অঘৰী কৰাতহে৷ ৰাজ্যত বৃদ্ধি হোৱা আইন শৃংখলা জনিত পৰিস্থিতিকলৈ ভ্ৰূক্ষেপেই নাই গৃহমন্ত্ৰীৰ৷
প্ৰতিদিনে নতুন নতুন ৰাজনৈতিক প্ৰপ’গেন্দাৰ সৃষ্টিত ব্যস্ত বিজেপি চৰকাৰৰ আমোলত যোৱা দুই দিনতে বহুকেইটা ভয়ংকৰ ঘটনা ঘটিছে গুৱাহাটী মহানগৰীত৷ পাণবজাৰৰ এটা পুখুৰিত অচিনাক্ত যুৱকৰ মৃতদেহ উদ্ধাৰ, ভাৰাঘৰত যুৱকৰ ৰহস্যজনক মৃত্যু, কৃষ্ণ নগৰত চোৰৰ সন্ত্ৰাস, পাণ্ডুত এজনক হত্যা কৰি মৃতদেহ পুতি থোৱা বা মুণ্ডহীন মৃতদেহ উদ্ধাৰ আদি মাত্ৰ কিছু উদাহৰণ৷
সংবাদমাধ্যমলৈ প্ৰেৰণ কৰা প্ৰেছ বিজ্ঞপ্তিত গৃহমন্ত্ৰী হিমন্ত বিশ্ব শৰ্মাৰ পদত্যাগ দাবী কৰিছে আম আদমি পাৰ্টী অসমে৷
চেলফী তুলা, খিলঞ্জীয়াক অঘৰী কৰা, গৰু চোৰক ৰক্ষণাবেক্ষণ দিয়া আদিত ব্যস্ত গৃহমন্ত্ৰী গৰাকীয়ে নিজৰ নৈতিক দ্বায়িত্ব স্বীকাৰ কৰি পদত্যাগ কৰক বুলি উল্লেখ কৰে ডা০ ভবেন চৌধুৰীয়ে৷
