জনসাধাৰণৰ সহযোগিতাৰ বাবেই কিছুদিন ধৰি কাজিৰঙাৰ গঁড় হত্যা নিয়ন্ত্ৰিত হৈছে। এই ধাৰাবাহিকতা অক্ষুন্ন ৰখাৰ বাবে গাওঁৰক্ষী সংগঠনেও কাম কৰা উচিত। আজি বোকাখাতত গাওঁৰক্ষী সংগঠনৰ এক সজাগতা সভাত এই দৰে কয় গোলাঘাটৰ আৰক্ষী অধীক্ষক পুস্পৰাজ সিঙে৷
প্ৰকৃতি সংগঠন ‘আৰণ্যক’ৰ উদ্যোগত আৰু গাওঁৰক্ষী সংগঠনৰ বোকাখাত থানা সমিতিৰ সহযোগত পুৱতি সাহিত্য সভা ভৱনত অনুষ্ঠিত চোৰাংচিকাৰ প্ৰতিৰোধ আৰু বন্যপ্ৰাণী সংৰক্ষনৰ এই সজাগতা সভাত কাজিৰঙাৰ কাষৰীয় গাওঁবোৰৰ গাওঁৰক্ষী সংগঠনৰ শতাধিক সদস্যই অংশগ্ৰহণ কৰে।
আৰণ্যকৰ আইন উপদেষ্টা কোষৰ প্ৰৱন্ধক মানস কুমাৰ ভট্টচাৰ্য্যই উদ্দেশ্য বাখ্যা কৰা সভাত বোকাখাতৰ মহকুমাধিপতি বিবেক শ্যামে গাওঁৰক্ষী সংগঠনৰ সদস্যসকলক গাঁৱৰ পৰিৱেশ উন্নিত কৰাৰ বাবে মদৰ প্ৰচলন নিষিদ্ধ কৰিবৰ বাবে আহ্বান জনায়।
ইয়াৰ উপৰি বোকাখাত আৰক্ষী থানাৰ ভাৰপ্ৰাপ্ত বিষয়া দিব্যজ্যোতি দত্তই মদৰ ঘাটি উচ্চেদ কৰাৰ লগতে চোৰাং চিকাৰীৰ তথ্য পালে আৰক্ষীক জনাবৰ বাবে আহ্বান জনায়। গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়াই বিশ্বত গঁড় প্ৰজাতি, গঁড়ৰ খড়্গৰ আন্তঃৰাষ্ট্ৰীয় চোৰাং ব্যৱসায় আৰু গঁড় হত্যাৰ তথ্যৰ সচিত্ৰ উপস্থাপন দাঙি ধৰে।
গোলাঘাট জিলাৰ উপ আৰক্ষী অধীক্ষক পাৰ্থ প্ৰতিম শইকীয়াই চোৰাংচিকাৰ প্ৰতিহত কৰাৰ বাবে কাম কৰা গাওঁৰক্ষী সংগঠনক ৰ গাওঁ সমিতিক দক্ষতাৰ ভিত্তিত পুৰস্কৃত কৰাৰ বাবে আৰণ্যকক পৰামৰ্শ দিয়ে।
আৰণ্যকৰ বোকাখাত সমিতিৰ সভাপতি মৃদুল বৰাৰ পৌৰহিত্যত অনুষ্ঠিত সভাত গোলাঘাট জিলাৰ আৰক্ষী অধীক্ষক পুস্পৰাজ সিং, পূব অসম বন্যপ্ৰাণী সংমণ্ডলৰ ডি এফ অ’ ৰমেশ গগৈ, অগৰাতলিৰ বনাঞ্চলিক বিষয়া বিদ্যুত বিকাশ বৰা, জে ডি এছ জি মহাবিদ্যালয়ৰ প্ৰাক্তন অধ্যক্ষ বাবুলাল মোৰ আৰু গাওঁৰক্ষী সংগঠনৰ সমন্বয়ক আৰিফ আহমেদ আদিয়ে মুখ্য অতিথি হিচাবে অংশগ্ৰহণ কৰে।
