কাৰ্যভাৰ গ্ৰহণ কৰিয়েই মুখ্যমন্ত্ৰী হিমন্ত বিশ্ব শৰ্মাই আৰক্ষীক মুক্ত স্বতন্ত্ৰতা দিয়াৰ বাবেই আৰক্ষীয়ে কোনো কাৰণ নোহোৱাকৈ জনতাক হাৰাশাস্তি কৰি আছে। এই অভিযোগ কৰিছে সদৌ অসম ছাত্ৰ সন্থাই।
সংবাদ মাধ্যমৰ সৈতে বাৰ্তালাপ কৰি আছুৰ সাধাৰণ সম্পাদক শংকৰ জ্যোতি বৰুৱাই কয়, “মুখ্যমন্ত্ৰীয়ে ৰাজ্যৰ আৰক্ষীক পূৰ্ণ স্বতন্ত্ৰতা দিছিল আৰু এতিয়া তেওঁলোকে সাধাৰণ মানুহক হাৰাশাস্তি কৰি আছে। আৰক্ষীয়ে আনকি তেওঁলোকক প্ৰশ্ন কৰা যিকোনো লোকৰ বিৰুদ্ধে ভুৱা গোচৰ ৰুজু কৰিবলৈ ওলোৱা হৈছে।”
তেওঁ লগতে কয় যে কেৱল ইয়াৰ বাবেই চিৰাঙত আৰক্ষীয়ে এজন সাংবাদিকক আক্ৰমণ কৰিছিল। আৰক্ষীৰ এই কাৰ্যক অতি নিন্দনীয় আখ্যা দিয়ে সাধাৰণ সম্পাদক জনে।
“ঘটনাটোত জড়িত আৰক্ষীসকলৰ বিৰুদ্ধে কঠোৰ ব্যৱস্থা লোৱা প্ৰয়োজন আৰু ৰিজাৰ্ভ ক্ল’জ কৰাটো এতিয়া এক পদক্ষেপ হিচাপে পৰ্যাপ্ত নহ’ব।” তেওঁ লগতে কয়।
তেওঁ অভিযোগ কৰে যে যদি আৰক্ষীয়ে এনেদৰে কাম কৰি থাকে তেন্তে অসামৰিক লোকসকল ক্ৰমাৎ অসুৰক্ষিত অৱস্থালৈ গতি কৰিব।
আনহাতে আছুৰ সভাপতি দীপাংক নাথে কয়, “যোৱা কেইদিনমানৰ পৰা এইটো স্পষ্ট হৈ আহিছে যে মানুহক উগ্ৰ আৰক্ষীৰ দ্বাৰা হাৰাশাস্তি কৰা হৈছে। প্ৰথমে ডিব্ৰুগড়ৰ ছাত্ৰ-ছাত্ৰী, তাৰ পিছত নগাঁৱত আৰু শেহতীয়াকৈ চিৰাঙত এনে কাৰ্য সংঘটিত হৈছে য’ত এজন কৰ্তব্যৰত সাংবাদিকক আক্ৰমণ আৰু হাৰাশাস্তি কৰা হৈছে।”
তেওঁ লগতে কয় যে মানুহে কেৱল প্ৰশ্ন সোধাৰ বাবেই সমস্যাত পৰিছে আৰু গৃহ বিভাগ এই ক্ষেত্ৰত সাৱধান হোৱা প্ৰয়োজন।
