দেশৰ বিভিন্ন অংশৰ লগতে ৰাজ্যৰ বিভিন্ন প্ৰান্তত ’কা’ বাতিলৰ দাবীত প্ৰতিবাদী কাৰ্যসূচী ৰূপায়ন হৈ অহাৰ বিপৰীতে শনিবাৰে নাগৰিকত্ব সংশোধনী আইন (কা) বাতিলৰ দাবীত মাৰ্ঘেৰিটা আঞ্চলিক ছাত্ৰ সন্থাৰ নেতৃত্বত এক প্ৰতিবাদী কাৰ্যসূচী ৰূপায়ন কৰা হয়।
জাতিধংসী আইনখনৰ বাতিলৰ দাবীত আছুৰ মাৰ্ঘেৰিটা আঞ্চলিকৰ সভাপতি চিন্তু গগৈ আৰু ভাৰপ্ৰাপ্ত সম্পাদক ৰুপম বৰুৱাৰ নেতৃত্বত উত্তৰ মাৰ্ঘেৰিটা ৰংগ মঞ্চত “মানৱ শৃংখল“ কাৰ্যসূচী ৰূপায়ন কৰি প্ৰতিবাদ সাব্যস্ত কৰা হয়।
প্ৰতিবাদকাৰীসকলে ’কা’ বাতিল কৰক, জয় আই অসম, বিজেপি গ’ বেক আদি বিভিন্ন শ্ল’গানেৰে পৰিবেশ উত্তাল কৰি তোলে।
আছু নেতৃবৃন্দই জাতি মাটি ভেটিৰ সুৰক্ষাৰ শ্ল’গানেৰে ক্ষমতালৈ অহা ৰাজ্য চৰকাৰখনৰ ভূমিকাক তীব্ৰ সমালোচনা কৰি কেন্দ্ৰ আৰু ৰাজ্য চৰকাৰৰ আইনখন বাতিলৰ দাবী জনায়।
আনহাতে, আছু আৰু ৩০ জনগোষ্ঠীয় সংগঠনৰ আহ্বানত যোৰহাট জিলাৰ টীয়কৰ কলিয়াপানী আদৰ্শ গাঁৱতো শনিবাৰে টীয়ক আঞ্চলিক ছাত্ৰ সন্থাৰ উদ্যোগত, টীয়ক আঞ্চলিক চুতীয়া ছাত্ৰ সন্থা, জুপিতাৰ ক্ৰিকেট ক্লাৱ তথা আদৰ্শগাঁওবাসী ৰাইজৰ সহযোগত আদৰ্শ গাঁৱৰ খেলপথাৰত মানৱ শৃংখল কাৰ্যসূচী ৰূপায়ন কৰা হয়।
টীয়ক আঞ্চলিক ছাত্ৰ সন্থাৰ সাধাৰণ সম্পাদক প্ৰীতমজ্যোতি শইকীয়াই আঁত ধৰা মানৱ শৃংখল কাৰ্যসূচীত সদৌ যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগ, প্ৰাক্তন ছাত্ৰ নেতা সৌৰভ বৰা, টীয়ক শাখা সাহিত্য সভাৰ সম্পাদক প্রশিল কুমাৰ বৰা, টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞা, সচেতন মহিলা ৰশ্মি ভট্টাচাৰ্য্য, গাঁৱৰ সচেতন ব্যক্তি লক্ষেশ্বৰ বৰাই কা বিৰোধিতাৰে বক্তব্য প্ৰদান কৰে।
প্ৰতিবাদকাৰীসকলে সৰ্বানন্দ সোণোৱাল মূর্দাবাদ, কা আমি নামনো, বিজেপি গ’ বেক, অসম চৰকাৰ হুচিয়াৰ, ক’লা আইন বাতিল কৰক, সাম্প্ৰদায়িক ৰাজনীতি নচলিব আদি ধ্বনি দি পৰিৱেশ উত্তাল কৰি তোলে।
তিনি শতাধিকৰো অধিক ৰাইজ সমবেত হোৱা মানৱ শৃংখল কাৰ্যসূচীত মানৱ অধিকাৰ সংগ্ৰাম সমিতিৰ নৰেশ গোস্বামী, যোৰহাট মহকুমা ছাত্ৰ সন্থাৰ সাংগঠনিক সম্পাদক যদুমণি বৰুৱা, টীয়ক আঞ্চলিক চুতীয়া ছাত্ৰ সন্থাৰ সভাপতি পাৰ্থ প্ৰতিম চুতীয়াকে ধৰি স্থানীয় ৰাইজ সমবেত হয়।
