বিতৰ্কিত নাগৰিকত্ব সংশোধনী বিধেয়ক ২০১৬ বাতিলৰ দাবীত ৰাজ্যত গঢ়ি উঠা প্ৰবল জনমত ইতিমধ্যেই কেন্দ্ৰ আৰু ৰাজ্যত শাসনত থকা বিজেপিৰ দৃষ্টিত অসাৰ প্ৰতিপন্ন হৈছে। অসমৰ খিলঞ্জীয়া ৰাইজৰ প্ৰতিবাদক সম্পূৰ্ণৰূপে আওকাণ কৰি জাতি-মাটি-ভেটি ৰক্ষাৰ শ্ল’গান দি অসমত চৰকাৰ কৰা বিজেপিয়ে বিধেয়কখন গৃহীত কৰাৰ বাবে উঠি পৰি লাগি আছে।
বিজেপিৰ এই ‘অসম বিৰোধী’ স্থিতিৰ বিপৰীতে জাঙুৰ খাই উঠিছে ৰাজ্যৰ খিলঞ্জীয়া দল-সংগঠন। আজি নৱবৰ্ষৰ প্ৰথম দিনটোতো বহুকেইটা দল-সংগঠনে শাসনাধিষ্ঠ বিজেপিৰ ‘জাতিধ্বংসী’ স্থিতিৰ বিৰুদ্ধে ৰাজ্যজুৰি প্ৰতিবাদ সাব্যস্ত কৰে। সমান্তৰালকৈ সদৌ অসম ছাত্ৰ সন্থাই নাগৰিকত্ব সংশোধনী বিধেয়কৰ জৰিয়তে বিজেপি চৰকাৰে ‘অসম চুক্তি’ক উলংঘা কৰিবলৈ ওলোৱা কাৰ্যক কোনো কাৰণতে মানি নলয় বুলি স্পষ্ট কৰি দিয়ে।
সদৌ অসম ছাত্ৰ সন্থাই সংবাদ মাধ্যমলৈ প্ৰেৰণ কৰা এক বিবৃতিত ‘একমাত্ৰ ৰাজনৈতিক সমীকৰণত অবৈধ বালাদেশীৰ ভোটবেংক সুৰক্ষিত কৰিবলৈ চৰকাৰ আৰু বিজেপি দলে অসমৰ খিলঞ্জীয়া মানুহৰ স্বাৰ্থ জ্বলাঞ্জলি দিলে’ বুলি উল্লেখ কৰি নাগৰিকত্ব সংশোধনী বিধেয়ক বলপূৰ্বকভাৱে জাপি দিব বিচৰা কাৰ্যৰ বিৰুদ্ধে আন্দোলন অব্যাহত থাকিব বুলি সদৰী কৰে।
বিবৃতিটোত ছাত্ৰ সন্থাৰ সভাপতি দীপাংক কুমাৰ নাথ আৰু সাধাৰণ সম্পাদক লুৰীণজ্যোতি গগৈয়ে যুটীয়া সংসদীয় সমিতিয়ে নাগৰিকত্ব সংশোধনী বিধেয়ক সন্দৰ্ভত অসম তথা উত্তৰ-পূৰ্বাঞ্চলত শুনানি সম্পূৰ্ণ নকৰিলে বুলি মন্তব্য কৰে।
‘যুটীয়া সংসদীয় সমিতিৰ প্ৰতিবেদন আংশিক হৈ থাকিব। অসমৰ বিভিন্ন প্ৰান্তৰ লগতে উত্তৰ-পূৰ্বাঞ্চলৰ সাতোখন ৰাজ্যলৈ গৈ জেপিচিয়ে জনসাধাৰণৰ মতামত নল’লে। জেপিচিয়ে নিজৰ প্ৰতিশ্ৰুতি পালন নকৰিলে। বলপূৰ্বকভাৱে বিধেয়কখন সমিতিখনে গ্ৰহণ কৰিলে। বিৰোধীৰ কথা নুশুনিলে,’ বিবৃতিটোত কয়।
উল্লেখ্য যে কালি নতুন দিল্লীত অনুষ্ঠিত জেপিচিৰ বৈঠকত বিৰোধীয়ে অনা বিধেয়কখনৰ আটাইকেইটা সংশোধনী প্ৰস্তাৱ নাকচ হৈছে। গতিকে ইয়াৰ দ্বাৰা বিজেপিয়ে প্ৰথমৰ পৰাই বিধেয়কখনৰ সপক্ষে প্ৰতিবেদন দিবলৈ যে বদ্ধপৰিকৰ আছিল সেই কথা ওলাই পৰা বুলিও ছাত্ৰ সন্থাই বিবৃতিটোত প্ৰকাশ কৰে।
লগতে বিজেপি শাসনলৈ অহাৰ আগতে অসমৰ জনসাধাৰণক দিয়া পাঁচটা মূল প্ৰতিশ্ৰুতিৰ কথা উল্লেখ কৰি এই আটাইকেইটা পালনত যে প্ৰধান মন্ত্ৰী নৰেন্দ্ৰ মোদী নেতৃত্বাধীন চৰকাৰ চূড়ান্তভাৱে ব্যৰ্থ হৈছে সেই কথা ছাত্ৰ সন্থাই আঙুলিয়াই দিয়ে।
সেই প্ৰতিশ্ৰুতিকেইটা আছিল প্ৰধান মন্ত্ৰী মোদীয়ে কোৱা ১৬ মে’ৰ পাছত বাংলাদেশীক টালি-টোপোলা বান্ধিব দিয়া, বিজেপিৰ ভিজন ডকুমে’ন্টত ‘অসম চুক্তি’ আখৰে আখৰে পালন কৰাৰ কথা, খিলঞ্জীয়া মানুহৰ স্বাৰ্থ সুৰক্ষিত কৰা, ২০১৪ৰ নিৰ্বাচনক দিয়া দ্বিতীয় শৰাইঘাটৰ ৰণৰ আখ্যা আৰু জাতি-মাটি-ভেটি ৰক্ষাৰ প্ৰতিশ্ৰুতি।
এই আটাইকেইটা কথাৰে এক বিপৰীত ছবিহে বিজেপি দল আৰু চৰকাৰৰ কাৰ্যকলাপত প্ৰকাশ পাইছে বুলি ছাত্ৰ সন্থাৰ নেতৃত্বই বিবৃতিটোত কৰা মন্তব্যত স্পষ্ট হৈ পৰে।
ইয়াৰ উপৰিও সদৌ অসম ছাত্ৰ সন্থা আৰু ৩০ টা জনগোষ্ঠীয় সংগঠনে পৰৱৰ্তী কাৰ্যপন্থা গ্ৰহণৰ বাবে অহা ৫ জানুৱাৰীত গুৱাহাটীত এখন সভা অনুষ্ঠিত কৰিব বুলিও এই বিবৃতিযোগে সদৌ অসম ছাত্ৰ সন্থাই জানিবলৈ দিয়ে।
