মুখ্য মন্ত্ৰী সৰ্বানন্দ সোণোৱাল নেতৃত্বাধীন ৰাজ্য চৰকাৰৰ পঞ্চায়ত, গ্ৰামোন্নয়ন আৰু জনসংযোগ বিভাগৰ নিযুক্তিত সংঘটিত কেলেংকাৰিৰ সন্দৰ্ভত চৰকাৰখনৰ নিৰ্লিপ্ত ভূমিকাৰ প্ৰতিবাদত তথা প্ৰক্ৰিয়াটোৰ সময় নিৰ্ধাৰিত ন্যায়িক তদন্তৰ দ্বাৰা দোষীক শাস্তি প্ৰদান আৰু নিবনুৱা যুৱক-যুৱতীক ন্যায় প্ৰদানৰ দাবীত আছুৱে আন্দোলনৰ কাৰ্যসূচী ঘোষণা কৰিছে।
সেই অনুসৰি ২০ মাৰ্চত সমগ্ৰ ৰাজ্যৰ প্ৰতিখন জিলা সদৰৰ ৰাজহুৱা স্থানত বিক্ষোভ প্ৰদৰ্শন কৰি প্ৰতিবাদ সাব্যস্ত কৰা হ’ব। তদুপৰি, হোলীৰ পাছত নিযুক্তিত সংঘটিত দুৰ্নীতি তথা কেলেংকাৰিৰ প্ৰতিবাদৰ লগতে আন আন্দোলনৰ কাৰ্যসূচী গ্ৰহণ কৰা হ’ব।
দুৰ্নীতিৰ বিৰুদ্ধে মুখ্য মন্ত্ৰী তথা ৰাজ্য চৰকাৰখনে কৈ অহা শূন্য সহনশীলতাৰ কথাবোৰ ফুটুকাৰ ফেনত পৰিণত হোৱা বুলিও আছুৱে স্পষ্টভাৱে সদৰী কৰে।
আছুৰ সভাপতি দীপাংক কুমাৰ নাথ আৰু সাধাৰণ সম্পাদক লুৰীণজ্যোতি গগৈয়ে কয় যে এইবাৰ পঞ্চায়ত, গ্ৰামোন্নয়ন আৰু জনসংযোগ বিভাগৰ নিযুক্তিত সংঘটিত অনিয়ম, স্বজন, তোষণ, দুৰ্নীতিৰ বিষয়ে সংবাদ মাধ্যমত বিস্তাৰিতভাৱে প্ৰকাশ হোৱাৰ পাছতো চৰকাৰে তথা মুখ্য মন্ত্ৰীয়ে ন্যায়িক তদন্তৰ ঘোষণা কৰিবলৈ সাহস গোটাব নোৱাৰিলে।
চৰকাৰৰ নিজৰ অনুসন্ধান বিভাগ চি আই ডিয়ে নিযুক্তিৰ বিসংগতিৰ বিষয়ে স্পষ্টভাৱে প্ৰকাশ কৰালৈ লক্ষ্য কৰি চি আই ডিৰ সম্পূৰ্ণ প্ৰতিবেদন প্ৰকাশ পোৱাৰ পূৰ্বেই নিযুক্তি দিয়া হ’ল। তদুপৰি, মুখ্য মন্ত্ৰীৰ অধীনৰ জনসংযোগ বিভাগত এদিনৰ ভিতৰতে পৰীক্ষা পাতি বহী নোচোৱাকৈ ফলাফল দি নিযুক্তিপত্ৰ বিতৰণ কৰা হ’ল। এই প্ৰক্ৰিয়া সম্পূৰ্ণ সন্দেহজনক।
ৰাজ্যখনৰ লাখ লাখ নিবনুৱা যুৱক-যুৱতীৰ নিযুক্তিৰ বিষয়টোত সোণোৱাল নেতৃত্বাধীন ৰাজ্য চৰকাৰখনে নিবনুৱা যুৱক-যুৱতীসকলৰ ভৱিষ্যতক লৈ হেতালি খেলিছে। নিবনুৱা যুৱক-যুৱতীসকলক ন্যায় প্ৰদানৰ বাবে এই অন্যায়ৰ বিৰুদ্ধে আছুৱে আন্দোলনৰ কাৰ্যসূচী গ্ৰহণ কৰা বুলি ব্যক্ত কৰিছে।
