অসমলৈ আহিলেই ভয়ংকৰ প্ৰতিবাদৰ সন্মুখীন হ’ব প্ৰধান মন্ত্ৰী নৰেন্দ্ৰ মোদী
অসমলৈ আহিলেই ভয়ংকৰ প্ৰতিবাদৰ সন্মুখীন হ’ব প্ৰধান মন্ত্ৰী নৰেন্দ্ৰ মোদী। গুৱাহাটীৰ উজানবজাৰস্থিত চহিদ ন্যাসত এক সংবাদমেল সম্বোধন কৰি এই কথা ঘোষণা কৰে আছুৰ সভাপতি দীপাংক নাথে।
‘অহা ১০ জানুৱাৰিৰ পৰা অনুষ্ঠিত হ’বলগীয়া খেল’ ইণ্ডিয়া কাৰ্য্যসূচীত অংশগ্ৰহণৰ বাবে প্ৰধান মন্ত্ৰী আহিলে তেনে প্ৰতিবাদ কৰা হ’ব। অতি জোৰদাৰভাৱে প্ৰতিবাদ কৰা হ’ব।‘ সংবাদমেলত স্পষ্ট ঘোষণা দীপাংক নাথৰ।
অৱশ্যে কি প্ৰতিবাদ কৰা হ’ব সেই কথা সংবাদমেলত প্ৰকাশ কৰাৰ পৰা বিৰত থাকে আছুৰ সভাপতিগৰাকী।
‘কি ধৰণে প্ৰতিবাদ কৰা হ’ব সেয়া পৰৱৰ্তী পৰ্য্যায়ত অৱগত কৰা হ’ব। নাথে এইদৰে কয়।
ইপিনে, আন্দোলনৰ কাৰ্য্যসূচী দীঘলীয়া হ’ব বুলি মন্তব্য কৰি নাথে কয়, ‘বিপদঘন্টা বজাইছে মোদী নেতৃত্বাধীন কেন্দ্ৰীয় চৰকাৰে।’
জাতিধ্বংসী ‘কা’ৰ বিৰুদ্ধে পৰৱৰ্তী সময়ত কি ধৰণে আন্দোলনৰ কাৰ্য্যসূচী গ্ৰহণ কৰিব সেই বিষয়ে উল্লেখ কৰি নাথে কয় ‘কেন্দ্ৰীয় চৰকাৰে অসমক অন্যায় কৰিছে। অহা ৩১ ডিচেম্বৰ আৰু ১ জানুৱাৰিত কা বিৰোধী সংকল্প ঘৰে ঘৰে ল’বলৈ সকলো অসমবাসীক আহ্বান জনাইছো। কা কেতিয়াও নামানো বুলি সকলোৱে সংকল্প ল’ব আৰু বিজেপিক উৎখাতৰ বাবে মনতে সকলোৱে আৰাধনা কৰি ল’ব।‘
ইপিনে, সেই দিন দুটাত কা বিৰোধী আন্দোলনৰ ছয়গৰাকী চহিদক শ্ৰদ্ধাঞ্জলি জনাই পদুলিৰ মুখে মুখে বা অঞ্চলে অঞ্চলে বন্তি প্ৰজ্বলনৰে প্ৰতিবাদ সাব্যস্ত কৰা হ’ব বুলিও তেওঁ জানিবলৈ দিয়ে।
তদুপৰি ৩ জানুৱাৰিত ‘কা’ৰ বিৰুদ্ধে জিলা সদৰ, মহকুমাত জোঁৰ লৈ আছুৱে প্ৰতিবাদ সাব্যস্ত কৰিব বুলি তেওঁ সংবাদমেলত জনায়।
‘৯ জানুৱাৰিত ৰণশিঙা অনুষ্ঠিত হ’ব। অঞ্চলে অঞ্চলে থলুৱা বাদ্যযন্ত্ৰ বা ৰণশিঙা বজাই ৰাজ্য চৰকাৰ আৰু কেন্দ্ৰীয় চৰকাৰক হুংকাৰ দিয়া হ’ব।‘ নাথে কয়।
তদুপৰি, ১১ জানুৱাৰিত আঞ্চলিকে আঞ্চলিকে জোঁৰ লৈ প্ৰতিবাদ সাব্যস্ত কৰিব সদৌ অসম ছাত্ৰ সন্থাই।
মাঘৰ বিহুৰ উৰুকাৰ দিনা নাগৰিকত্ব সংশোধনী আইনখন জুইশাল আৰু মেজিৰ জুইত দাহ কৰা হ’ব বুলিও নাথে জনায়।
নাথে আৰু কয়, ‘জনপ্ৰতিনিধিসকলক হেঁচা প্ৰয়োগ কৰা হ’ব, বিজেপিৰ লগত হাত উজান দিয়া অগপ নামৰ অপশক্তিটোৰ নেতাৰ ওপৰতো হেঁচা প্ৰয়োগ কৰা হ’ব।‘
ইপিনে, কেন্দ্ৰীয় চৰকাৰক সকলোপ্ৰকাৰে উৎখাত কৰিবলৈ আন্দোলনৰ কাৰ্য্যসূচী চলাই নিয়া হ’ব বুলি সদৰী কৰি নাথে কয়, ‘প্ৰতিটো প্ৰতিবাদ অহিংস আৰু শান্তিপূৰ্ণ হ’ব।‘