দেশজুৰি এতিয়া আৰম্ভ হৈছে কোভিডৰ মহা সংহাৰ। ৰাজ্যই ৰাজ্যই বৃদ্ধি পাইছে অমিক্ৰন সংক্ৰমণৰ ঘটনা এনে সময়তে আজি কেন্দ্ৰীয় নিৰ্বাচন আয়োগে নিৰ্বাচন অনুষ্ঠিত হ’বলগীয়া পাঁচ খন ৰাজ্যক কোভিচ ভেকচিন প্ৰদানৰ কাম অধিক দ্ৰুত ভাবে সম্পাদন কৰিবলৈ নিৰ্দেশ দিছে।
নিৰ্বাচন আয়োগে মহামাৰীৰ মোকাবিলাৰ বাবে চলি থকা টিকাকৰণ অভিযান ত্বৰান্বিত কৰিবলৈ পাঁচখন নিৰ্বাচনী ৰাজ্যলৈ আজি এখন পত্ৰ প্ৰেৰণ কৰিছে। শীঘ্ৰে নিৰ্বাচন অনুষ্ঠিত হ’বলগীয়া ৫ খন ৰাজ্যৰ মুখ্য সচিবসকললৈ চিঠি পত্ৰ খনত কোভিডৰ ভয়াৱহতাৰ প্ৰতি লক্ষ্য ৰাখিয়েই ভেকচিন প্ৰদান প্ৰক্ৰিয়া অধিক ক্ষীপ্ৰতাৰে কৰিবলৈ নিৰ্দেশ দিয়া হৈছে।
নিৰ্বাচন আয়োগে মণিপুৰত টিকাকৰণৰ প্ৰথম পালিৰ নিম্ন হাৰক লৈও উদ্বেগ প্ৰকাশ কৰিছে।
মুখ্য নিৰ্বাচন আয়ুক্ত সুশীল চন্দ্ৰই সকলো ৰাজনৈতিক দলেই নিৰ্ধাৰিত সময়মতেই পাঁচ ৰাজ্যত নিৰ্বাচন অনুষ্ঠিত কৰাটো বিচাৰিছে বুলি মন্তব্য কৰিছিল।
তেওঁ এনে মন্তব্যৰ জৰিয়তে স্পষ্ট ইংগিত দিছিল যে পাঁচখন নিৰ্বাচনমুখী ৰাজ্যত নিৰ্বাচন স্থগিত কৰা নহ’ব।
ইয়াৰ পূৰ্বে ভাৰতৰ নিৰ্বাচন আয়োগৰ শীৰ্ষ পদাধিকাৰীসকলে সোমবাৰে কেন্দ্ৰীয় স্বাস্থ্য সচিব ৰাজেশ ভূষণক সাক্ষাৎ কৰিছিল আৰু পাঁচখন নিৰ্বাচনমুখী ৰাজ্যত কোভিডৰ সংক্ৰমণ তথা ভেকচিন প্ৰদানৰ বিষয়টোকলৈ খৰচি মাৰি আলোচনা কৰিছিল।
উল্লেখ্য অহা বছৰ উত্তৰ প্ৰদেশ, মণিপুৰ, উত্তৰাখণ্ড, গোৱা আৰু পঞ্জাৱত বিধানসভা নিৰ্বাচন অনুষ্ঠিত হ’ব।
ইয়াৰ পূৰ্বে, অমিক্ৰনৰ আতংকৰ বাবে এলাহাবাদ উচ্চ ন্যায়ালয়ে ভাৰতৰ নিৰ্বাচন আয়োগক উত্তৰ প্ৰদেশৰ বিধানসভা নিৰ্বাচন কমেও ১-২ মাহৰ বাবে স্থগিত ৰাখিবলৈ কৈছিল।
ন্যায়ালয়ে আনকি ৰাজনৈতিক দলসমূহৰ ৰেলী আৰু ৰাজহুৱা সভা তাৎক্ষণিকভাৱে নিষিদ্ধ কৰিবলৈ পৰামৰ্শ দিছিল।
এতিয়ালৈকে দেশৰ ২৩ খন ৰাজ্য আৰু কেন্দ্ৰীয় শাসিত অঞ্চলত মুঠ ১,৭০০ গৰাকী লোক অমিক্ৰনত আক্ৰান্ত হৈছে।
মহাৰাষ্ট্ৰত সৰ্বাধিক ৫১০ গৰাকী লোক অমিক্ৰনত আক্ৰান্ত হোৱাৰ দিল্লীত ৩৫১, কেৰালাত ১৫৬,গুজৰাটত ১৬ ,তামিলনাডুত ১২১, আৰু ৰাজস্থানত ১২০গৰাকী লোক অমিক্ৰনত আক্ৰান্ত হোৱাৰ খবৰ আহিছে।
