Gujarat Riots সমাজকৰ্মী তিস্তা শীতলৱাড়ক মুম্বাইৰ তেওঁৰ বাসগৃহৰ পৰা আটক কৰা হৈছে। তেওঁক শনিবাৰে আটক কৰি গুজৰাট এটিএছে (এন্টি টেৰ’ৰ স্কোৱাড) ছাণ্টাক্ৰুজ আৰক্ষী চকীলৈ লৈ যায়। এতিয়া তেওঁক আহমেদাবাদলৈ লৈ যোৱা হৈছে।
আনহাতে, গুজৰাটৰ গান্ধীনগৰৰ পৰা প্ৰাক্তন জ্যেষ্ঠ আইপিএছ বিষয়া আৰ বি শ্ৰীকুমাৰকো আটক কৰা হৈছে।
২০০২ চনৰ গুজৰাট সংঘৰ্ষৰ সন্দৰ্ভত তিস্তা আৰু দুগৰাকী প্ৰাক্তন আইপিএছ বিষয়াৰ বিৰুদ্ধে এখন এজাহাৰ দাখিল কৰা হৈছে। তেওঁলোকে গুজৰাট সংঘৰ্ষৰ বিষয়ে ভুল তথ্য দিছিল বুলি অভিযোগ কৰা হৈছে।
লক্ষণীয় যে বিশেষ তদন্তকাৰী দলে গুজৰাট হিংসাত ৬৪ জন লোকক ক্লিনশ্বীট দিছে। উচ্চতম ন্যায়ালয়েও এই সম্পৰ্কত একেটা ৰায় দিয়ে।
শনিবাৰে সংবাদ সংস্থাক দিয়া এক সাক্ষাৎকাৰত অমিত শ্বাহে গুজৰাটৰ হিংসাক লৈ কংগ্ৰেছক সমালোচনা কৰিছিল। তেওঁ ১৯৮৪ চনৰ শিখ বিৰোধী হিংসাৰ বিষয়টোও উত্থাপন কৰিছিল। একে সময়তে তেওঁ তিস্তাৰ বিৰুদ্ধে গুজৰাট হিংসাৰ বিষয়ে মিছা তথ্য দিয়াৰ অভিযোগ উত্থাপন কৰে।
কাকতালীয়ভাৱে, গুজৰাট এটিএছ তেতিয়াই মুম্বাইলৈ আহিছিল আৰু তিস্তাক আটক কৰিছিল।
গুজৰাটৰ এজন আৰক্ষী বিষয়া ডি বি বৰদে শীতলৱাড় আৰু প্ৰাক্তন আইপিএছ বিষয়া শ্ৰীকুমাৰ আৰু সঞ্জীৱ ভাটৰ বিৰুদ্ধে এজাহাৰ দাখিল কৰিছিল।
শ্ৰীকুমাৰক গান্ধীনগৰৰ পৰা আহমেদাবাদ আৰক্ষীৰ অপৰাধ শাখাই আটক কৰিছে। তিস্তাৰ বিৰুদ্ধে জালিয়াতি আৰু ভুল তথ্য দিয়াৰ অভিযোগ উত্থাপিত হৈছে।
ইপিন, তিস্তাৰ অধিবক্তা বিজয় হিৰেমাথে অভিযোগ কৰে যে আগতীয়াকৈ কোনো খৱৰ নিদিয়াকৈ গুজৰাট এটিএছে বলপূৰ্বক তিস্তাৰ ঘৰত প্ৰৱেশ কৰে আৰু শাৰীৰিকভাৱে অপদস্থ কৰি আটক কৰি লৈ যায়।
