ৰাজ্যৰ সাংস্কৃতিক মহলক শোকস্তব্ধ কৰি চিৰ দিনৰ বাবে চকু মুদিলে জনপ্ৰিয় অভিনেতা নিপন গোস্বামীয়ে। আজি পুৱা ৯ বাজি ১৫ বজাত চিকিৎসাধীন অৱস্থাতে তেওঁৰ মৃত্যু হয়। অসুস্থ হৈ পৰা অভিনেতাগৰাকীক গুৱাহাটীৰ নেমকেয়াৰ চিকিৎসালয়ত ভৰ্তি কৰোৱা হৈছিল।
১৯৪৭ চনত তেজপুৰৰ কলিবাৰীত অভিনেতাগৰাকীৰ জন্ম হৈছিল। তেওঁৰ পিতৃ আছিল চন্দ্ৰধৰ গোস্বামী আৰু মাতৃ নিৰুপমা গোস্বামী । সৰুৰে পৰাই ঘৰত এক সাংস্কৃতিক পৰিবেশ লাভ কৰা নিপন গোস্বামীয়ে পিছলৈ অভিনয় জগতৰ সৈতে জৰিত হৈ পৰে। বোলছবিৰ উপৰি তেওঁ নাটকতো অভিনয় কৰিছিল ।
নিপন গোস্বামীয়ে ১৯৬৫ চনত পুনেলৈ অভিনয়ৰ প্ৰশিক্ষণৰ বাবে গৈছিল। তাতেই তেওঁ সুভাষ ঘাই, শত্ৰুঘ্ন সিন্হা বিখ্যাত প্ৰযোজক, অভিনেতাৰ সান্নিধ্যলৈ আহিছিল। নিপন গোস্বামীয়ে অভিনয় কৰা প্ৰথম ছবি আছিল ফণী শৰ্মাৰ দ্বাৰা পৰিচালিত ‘পিয়লি ফুকন’। ছবি খন ১৯৫৭ চনত মুক্তি পাইছিল ।
তেওঁ শতাধিক টেলিফিল্মতো অভিনয় কৰিছিল।
অভিনেতা নিপন গোস্বামীয়ে কহিনুৰ, আৱাহন, হেঙুল আৰু শকুন্তলা থিয়েটাৰতো অভিনয় কৰি দৰ্শকৰ প্ৰশংসা বুটলিছিল। নিপন গোস্বামী অভিনীত ছবিসমূহৰ অন্যতম এইসমূহ ছবি ককা দেউতাৰ নাতি আৰু হাতী, আজলি নবৌ, কাল সন্ধ্যা,শকুন্তলা আৰু শংকৰ যোছেফ আলি, মৰীচিকা, কাদম্বৰী,তুমি আহিবানে, পলে পলে উৰে মন, বান্ধৈ, সৰু বোৱাৰী,হিয়া দিয়া নিয়া, তুমি মোৰ মাথোঁ মোৰ, পুৰৱ কী আৱাজ,গানে কি আনে, শৈশৱতে ধেমালিতে আদি ।
২০২১ বৰ্ষত নিপন গোস্বামীক ড০ ভবেন্দ্ৰ নাথ শইকীয়া বঁটাৰে সন্মানিত কৰা হৈছিল। নিপন গোস্বামীৰ মৃত্যুত সমগ্ৰ ৰাজ্যতে শোকৰ ছাঁ পৰিছে।
