ওৰেটো জীৱন চিনেমা আৰু নাটকত অভিনয় কৰি দৰ্শকক মোহাচ্ছন্ন কৰি ৰখা সতীশ কৌশিক আৰু নাই। বৃহস্পতিবাৰে পুৱা বলীউডৰ বলিষ্ঠ অভিনেতা তথা পৰিচালক সতীশ কৌশিকে ৬৬ বছৰ বয়সত হৃদৰোগত আক্ৰান্ত হৈ জীৱন নাটৰ পৰা মেলানি মাগে। মৃত্যুৰ সময়ত অভিনেতাগৰাকীয়ে তেওঁ পত্নী আৰু কন্যাক এৰি থৈ যায়।
আজি পুৱা এই খবৰটো তেওঁৰ বন্ধু তথা ৰাষ্ট্ৰীয় বঁটা বিজয়ী অভিনেতা অনুপম খেৰে এক টুইটযোগে জনাইছে।।
খেৰে নিজৰ আৰু কৌশিকৰ এখন ছবি শ্বেয়াৰ কৰি টুইটযোগে কয়, “মই জানো ‘মৃত্যু এই পৃথিৱীৰ চূড়ান্ত সত্য!’ কিন্তু মই সপোনতো ভবা নাছিলো যে মই জীয়াই থকাৰ সময়ত মোৰ প্ৰিয় বন্ধু সতীশ কৌশিকৰ মৃত্যুৰ কথা লিখিম ।”
লগতে বলীউডৰ অভিনেত্ৰী কংগনা ৰানাউটেও টুইটাৰত প্ৰবীণ অভিনেতা–পৰিচালকগৰাকীক শেষ শ্ৰদ্ধা জনায়।
ৰানাৱটে লিখিছে, “এজন অতি সফল অভিনেতা আৰু পৰিচালক সতীশ কৌশিকজী ব্যক্তিগতভাৱেও আছিল এজন অতি দয়ালু আৰু প্ৰকৃত মানুহ।” চলিত বৰ্ষৰ অক্টোবৰ মাহত মুক্তি পাবলগীয়া এখন ছবিত ৰানাৱত আৰু কৌশিকে একেলগে অভিনয় কৰিছে।
সতীশ কৌশিকে ১৯৫৬ চনৰ ১৩ এপ্ৰিলত হাৰিয়ানাত জন্মগ্ৰহণ কৰিছিল । বলীউডত ভৰি দিয়াৰ আগতে কৌশিক আছিল নাট্যশিল্পী। মিষ্টাৰ ইণ্ডিয়া (১৯৮৭), জানে ভি ডো ইয়াৰন (১৯৮৩), সাজন চালে ছাছুৰাল (১৯৯৬), বাদে মিয়ান ছোটে মিয়ান (১৯৯৮), উদতা পঞ্জাব (২০১৬), আৰু ছুৰমা (২০১৮) আদি ছবিত অভিনয়ৰ বাবে তেওঁ খ্যাতি অৰ্জন কৰিছিল।
২০২২ চনত আমাজন প্ৰাইম ভিডিঅ’ত মুক্তি পোৱা ঋষি কাপুৰৰ শেষৰখন ছবি ‘শৰ্মাজী নামকীন’তো তেওঁক দেখা গৈছিল। ১৯৯০ চনত ৰাম লক্ষণৰ বাবে আৰু ১৯৯৭ চনত ‘সাজন চালে ছাছুৰাল‘ৰ বাবে ফিল্মফেয়াৰ শ্ৰেষ্ঠ কমেডিয়ান বঁটাও লাভ কৰিছিল সতীশ কৌশিকে।
এতিয়া এইদৰে হঠাৎ অভিনেতা জনৰ মৃত্যুৱে বলিউডত এক শূন্যতাৰ সৃষ্টি কৰাৰ লগতে শোকৰ ছাঁ পেলাইছে।
