যোৱা ১৫ ফেব্ৰুৱাৰীত উচ্চতম ন্যায়ালয়ৰ সাংবিধানিক বিচাৰপীঠে নিৰ্বাচনী বণ্ড অসাংবিধানিক বুলি ঘোষণা কৰে। এই পৰিপ্ৰেক্ষিতত ভাৰতীয় ষ্টেট বেংকক নিৰ্বাচনী বণ্ড সম্পৰ্কীয় সকলো তথ্য ৬ মাৰ্চৰ ভিতৰত দাখিল কৰিবলৈ নিৰ্দেশ দিয়া হয়। অৱশ্যে এই তথ্য দাখিল কৰিবলৈ দেশৰ সৰ্ববৃহৎ চৰকাৰী বেংকটোৱে ৩০ জুনলৈকে সময় বিচাৰিছে।
কিন্তু উচ্চতম ন্যায়ালয়ে দিয়া সময়সীমা উকলি যোৱাৰ পিছতে ভাৰতীয় ষ্টেট বেংকৰ বিৰুদ্ধে আদালত অৱমাননাৰ আবেদন ৰুজু কৰা হয়। আজি উচ্চতম ন্যায়ালয়ত এই আৱেদন দাখিল কৰে এছ’চিয়েচন ফৰ ডেম’ক্ৰেটিক ৰিফৰ্মে।
এছ’চিয়েশ্যন ফৰ ডেম’ক্ৰেটিক ৰিফৰ্মছ (এ ডি আৰ)ৰ হৈ আজি উচ্চতম ন্যায়ালয়ত অধিবক্তা প্ৰশান্ত ভূষণে অৱমাননাৰ গোচৰ ৰুজু কৰে। ইয়াৰ পূৰ্বে ৪ মাৰ্চত এছ বি আইয়ে উচ্চতম ন্যায়ালয়ত আবেদন দাখিল কৰি নিৰ্বাচনী বণ্ড সম্পৰ্কীয় তথ্য দাখিল কৰিবলৈ তেওঁলোকক ৩০ জুনলৈকে সময় দিয়াৰ দাবী জনাইছিল।
এছ বি আইৰ দাবী যে নিৰ্বাচনী বণ্ডৰ সৈতে জড়িত তথ্য ‘ডিকোড’ কৰিবলৈ সময় লাগিব পাৰে। বেংক কৰ্তৃপক্ষই দাবী কৰিছিল যে এই সমগ্ৰ প্ৰক্ৰিয়াটো অতি জটিল। ইফালে এছ বি আইৰ অনুৰোধ গ্ৰহণ কৰি তথ্য দাখিলৰ সময়সীমা বৃদ্ধি কৰিলে ইয়াৰ অৰ্থ হ’ল লোকসভা নিৰ্বাচনৰ পিছতহে এই তথ্য ৰাজহুৱা হ’ব। বেংকটোৰ তথ্য অনুসৰি এই পৰ্যন্ত মুঠ ২২ হাজাৰ ২১৭টা নিৰ্বাচনী বণ্ড বিক্ৰী হৈছে।
উল্লেখ্য যে ২০২১ চনত অসম আৰু পশ্চিমবংগ বিধানসভা নিৰ্বাচনৰ পূৰ্বে নিৰ্বাচনী বণ্ডৰ বিৰুদ্ধে সৰ্বোচ্চ আদালতত জনস্বাৰ্থৰ গোচৰ ৰুজু হৈছিল। গোচৰকাৰীসকলে অভিযোগ কৰে যে ৰাজনৈতিক দলসমূহে এই বণ্ডসমূহৰ জৰিয়তে অবৈধ আৰু বিদেশী উৎসৰ পৰা ধন লাভ কৰিব পাৰে আৰু ইয়াৰ ফলত গণতন্ত্ৰ ধ্বংস হ’ব। এনে পৰিস্থিতিত কেন্দ্ৰীয় চৰকাৰে আদালতত দাবী কৰিছিল যে নিৰ্বাচনত ক’লা ধন ৰোধ কৰিবলৈ নিৰ্বাচনী বণ্ডৰ ব্যৱস্থা প্ৰৱৰ্তন কৰা হৈছে।
ইয়াৰ পূৰ্বে উচ্চতম ন্যায়ালয়ক কেন্দ্ৰীয় চৰকাৰে জনাইছিল যে নিৰ্বাচনী বণ্ডৰ তথ্যৰ বিষয়ে জানিবলৈ নাগৰিকৰ কোনো অধিকাৰ নাই। মন কৰিবলগীয়া যে ২০১৮ চনত এই নিৰ্বাচনী বণ্ড আঁচনিখন প্ৰৱৰ্তন কৰা হৈছিল। তেতিয়াৰ পৰাই দেশত কোনো বাধা নোহোৱাকৈ বণ্ড বিক্ৰী হৈছিল।
লগতে পঢ়কঃ লাচিতৰ প্ৰতিমূৰ্তি উন্মোচন! প্ৰধানমন্ত্ৰীৰ অসম ভ্ৰমণৰ দিনা কা-বিৰোধী প্ৰতিবাদ নকৰে আছুৱে
ইপিনে, ৰাজনৈতিক দলৰ হাতত নগদ ধনৰ অভাৱত নিৰ্বাচনী বণ্ড বিক্ৰীৰ অনুমতি দিয়া হৈছে বুলি নিৰ্বাচন আয়োগে উচ্চতম ন্যায়ালয়ক অৱগত কৰে। আয়োগে দাবী কৰিছে যে নিৰ্বাচনী বণ্ডত কোনো অস্পষ্টতা নাই। কিন্তু দুয়োটা পক্ষৰ যুক্তি শুনি উচ্চতম ন্যায়ালয়ৰ সাংবিধানিক বিচাৰপীঠে এক ঐতিহাসিক ৰায়দানত কয় যে ৰাজনৈতিক দলসমূহে নিৰ্বাচনী বণ্ড বিক্ৰী কৰি যি ধৰণে ধন সংগ্ৰহ কৰিছে সেয়া অসাংবিধানিক।
