ধুবুৰী নিৰ্বাচনী জিলাৰ ৫টা বিধানসভা সমষ্টিত ৪গৰাকী প্ৰাৰ্থীয়ে মনোনয়ন প্ৰত্যাহাৰ কৰাৰ পাছত এতিয়া মুঠ ৪১গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াব।
অহা ৬এপ্ৰিলত ধবুৰী নিৰ্বাচনী জিলাৰ পাঁচটা সমষ্টি ক্ৰমে ধুবুৰী, গৌৰীপুৰ, গোলকগঞ্জ, বিলাসীপাৰা পূব আৰু বিলাসীপাৰা পশ্চিম বিধানসভা সমষ্টিত ভোটগ্ৰহণ অনুষ্ঠিত হ’ব।
সোমবাৰে ধুবুৰী জিলাত আগন্তুক বিধানসভা নিৰ্বাচনৰ বাবে চাৰিগৰাকী নিৰ্দলীয় প্ৰাৰ্থীয়ে মনোনয়ন প্ৰত্যাহাৰ কৰে।
এই চাৰিগৰাকী নিৰ্দলীয় প্ৰাৰ্থীৰ ভিতৰত দুগৰাকী বিলাসীপাৰা পূব বিধানসভা সমষ্টিত আৰু ধুবুৰী আৰু গোলকগঞ্জ সমষ্টিৰ এগৰাকীকৈ প্ৰাৰ্থীয়ে মনোনয়ন পত্ৰ প্ৰত্যাহাৰ কৰে।
মনোনয়ন প্ৰত্যাহাৰ কৰা চাৰিগৰাকী প্ৰাৰ্থী হ’ল বিলাসীপাৰা পূব সমষ্টিৰ ধনেশ্বৰ ৰয় আৰু সন্দীপ কুমাৰ দেবনাথ, ধুবুৰী সমষ্টিৰ নাজিবুল ওমৰ আৰু গোলকগঞ্জ সমষ্টিৰ পাপুলি সাহা।
ধুবুৰীৰ উপায়ুক্ত তথা ৰিটাৰ্ণিং বিষয়া দেব কুমাৰ কলিতা সোমবাৰে কয়,’’মনোনয়ন প্ৰত্যাহাৰ প্ৰক্ৰিয়া সম্পূৰ্ণ হোৱাৰ পাছত ধুবুৰী মহকুমাৰ অধীনৰ ধুবুৰীত ৭গৰাকী, গৌৰীপুৰত ৯গৰাকী আৰু গোলকগঞ্জত ৭গৰাকীকে ধৰি মুঠ ২৩গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াব।
সেইদৰে, ধুবুৰী জিলাৰ বিলাসীপাৰা মহকুমাৰ অধীনৰ বিলাসীপাৰা পূব সমষ্টিত ১১গৰাকী প্ৰাৰ্থী আৰু বিলাসীপাৰা পশ্চিম সমষ্টিত ৭গৰাকীকে ধৰি মুঠ ১৮গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াব।
