ফেচবুকৰ পাছত এইবাৰ ৰিলায়েন্স জিঅ’ত বিনিয়োগ কৰিবলৈ আগবাঢ়িছে আমেৰিকান সংস্থা ছিলভাৰ লেক। সোমবাৰে ৰিলায়েন্স ইণ্ডাষ্ট্ৰীজে প্ৰকাশ কৰা এক বিবৃতিত এই কথা সদৰী কৰা হৈছে।
কোৱা হৈছে যে জিঅ’ত ছিলভাৰ লেকে ৭৪৬.৭৪ মিলিয়ন মাৰ্কিন ডলাৰ অৰ্থাৎ ৫,৬৫৬কোটি টকা বিনিয়োগ কৰিছে।
যোৱা এপ্ৰিল মাহত জিঅ’ ডিজিটেল প্লেটফৰ্মত ছচিয়েল মিডিয়াৰ সৰ্ববৃহৎ সংস্থা ফেচবুকে বিনিয়োগৰ পাতনি মেলি ৪৩হাজাৰ ৫৭৪ কোটি টকাৰে ৰিলায়েন্স জিঅ’ৰ ৯.৯শতাংশ শ্বেয়াৰ ক্ৰয় কৰিছিল।
ফেচবুকৰ প্ৰতিষ্ঠাতা মাৰ্ক জুকাৰবাৰ্গে জানিবলৈ দিছিল যে বিশ্বজুৰি ফেচবুকৰ গ্ৰাহক আৰু বৃদ্ধিৰ উদ্দেশ্যে জিঅ’ৰ সৈতে তেওঁলোকে চুক্তিবদ্ধ হৈছে।
সেই একে পথেৰেই এইবাৰ ডিজিটেল প্লেটফৰ্মত প্ৰৱেশ কৰিছে আমেৰিকাৰ বেচৰকাৰী ইকুইটি সংস্থা ছিলভাৰ লেক। এই সংস্থাৰ বিনিয়োগৰ ফলত জিঅ’ৰ বজাৰ মূল্য ভাৰতীয় মুদ্ৰাত ৪.৯০ লাখ কোটিলৈ বৃদ্ধি পালে।
চুক্তিক লৈ ৰিলায়েন্স ইণ্ডাষ্ট্ৰীজৰ মুৰব্বী মুকেশ আম্বানিয়ে কয়,’’আমাৰ অতি গুৰুত্বপূৰ্ণ পাৰ্টনাৰ হিচাপে ছিলভাৰ লেকক আদৰণি জনাইছো। এই পদক্ষেপৰ ফলত ভাৰতৰ ডিজিটেল ইক’চিষ্টেম তথা ডিজিটেল প্লেটফৰ্মৰ ভাৰতীয় গ্ৰাহকসকল উপকৃত হ’ব।‘’
ছিলভাৰ লেকৰ এগৰাকী শীৰ্ষ বিষয়া ইগন ডাৰবানে কয়, ‘’জিঅ’ প্লেটফৰ্মত বিশ্বৰ শীৰ্ষ সংস্থাসমূহৰ ভিতৰত অন্যতম। ইয়াৰ নেতৃত্ব আছে এক শক্তিশালী তথা উদ্ভাৱনী ক্ষমতাসম্পন্ন মেনেজমেন্ট টীম। মুকেশ আম্বানিৰ সৈতে সহযোগিতা কৰিবলৈ পাই আমি সন্মানিত বোধ কৰিছো।‘’
ইপিনে, ফেচবুকৰ সৈতে ৰিলায়েন্স জিঅ’ৰ অভিলেখ পৰিমানৰ ধনৰ চুক্তিৰ পাছত এছিয়াৰ আটাইতকৈ ধনী ব্যক্তিৰ স্থান দখল কৰিছে মুকেশ আম্বানিয়ে।
