কংগ্ৰেছে ৰাজ্যত অনুষ্ঠিত হ’বলগীয়া তৃতীয় পৰ্য্যায়ৰ নিৰ্বাচনৰ প্ৰাৰ্থী ঘোষণা কৰাৰ পাছতে শুকুৰবাৰে নিশা অসম গণ পৰিষদেও বৰপেটা আৰু ধুবুৰী সমষ্টিৰ প্ৰাৰ্থীৰ নাম আনুষ্ঠানিক ভাবে ঘোষণা কৰে।
অগপৰ সভাপতি অতুল বৰাৰ বাসভৱনত নিশা অনুষ্ঠিত হোৱা দলীয় বৈঠকৰ পাছতে দলে বৰপেটাৰ পৰা প্ৰাক্তন অগপ মন্ত্ৰী তথা প্রাক্তন ৰাজ্যসভাৰ সাংসদ কুমাৰ দীপক দাস আৰু ধুবুৰীৰ পৰা জাৱেদ ইছলামক প্ৰাৰ্থী হিচাপে আনুষ্ঠানিকভাবে ঘোষণা কৰে।
বৰপেটাত অগপ আৰু মিত্ৰদলৰ সমৰ্থিত প্ৰাৰ্থী কুমাৰ দীপক দাস কংগ্ৰেছৰ আব্দুল খালেক আৰু এ আই য়ু ডি এফৰ প্ৰাৰ্থী হাফিজ ৰফিকুল ইছলামৰ মাজত ত্ৰিকোণীয়া প্ৰতিদ্বন্দ্বিতা হোৱাৰ সম্ভাৱনা আছে।
উল্লেখযোগ্য যে, দুয়োটা মুছলমান জনসংখ্যা প্ৰধান সমষ্টি বৰ্তমান এ আই য়ু ডি এফৰ দখলত আছে। বদৰুদ্দিন আজমল আৰু আজমলৰ ভাতৃ ছিৰাজুদ্দিন আজমলে ক্ৰমে ধুবুৰী আৰু বৰপেটাত সাংসদ হিচাপে আছে। ২০১৯ লোকসভা নিৰ্বাচনত এ আই য়ু ডি এফে ছিৰাজুদ্দিন আজমলক প্ৰাৰ্থীত্ব নিদি বদৰুদ্দিনৰ অতি ঘনিষ্ঠ হাফিজ ৰফিকুল ইছলামক প্ৰাৰ্থিত্ব প্ৰদান কৰিছে।
আনহাতে, প্ৰাৰ্থিত্ব লাভ কৰিয়ে কংগ্ৰেছৰ বিৰুদ্ধে সমালোচনাত সৰৱ হৈ পৰে কুমাৰ দীপক দাস। বৰপেটা লোকসভা সমষ্টিত কংগ্ৰেছৰ প্ৰাৰ্থী আব্দুল খালেকক শিখণ্ডি আখ্যা দি দাসে একমাত্ৰ কংগ্ৰেছ আৰু এ আই য়ু ডি এফৰ মিত্ৰতাক ঢাকিবৰ বাবে কংগ্ৰেছে প্ৰাৰ্থী দি ৰাইজক আভুৱা ভাৰিব বিচাৰিছে বুলি সংবাদ মাধ্যমৰ আগত মন্তব্য কৰে।
