টীয়ক বিধানসভা সমষ্টিত ব্যৱসায়ী শ্যামকানু মহন্তক প্ৰাৰ্থীত্ব আগবঢাব বুলি খবৰ ওলোৱাৰ পাছতে তাৰ বিৰুদ্ধে ক্ষোভ উজাৰিলে অগপ নেত্ৰী মৌচুমী বৰাই।
শুক্ৰবাৰে দিছপুৰ প্ৰেছ ক্লাৱত এখন সংবাদমেলত টীয়কৰ অগপ নেত্ৰী মৌচুমী বৰাই অগপ নেতৃত্বৰ বিৰুদ্ধে ক্ষোভ উজাৰি কয় “অগপ পৰা বিধানসভা নিৰ্বাচনৰ বাবে প্ৰাৰ্থীত্ব বিচাৰিছিলো যদিও মোক প্ৰাৰ্থীত্বৰ পৰা বঞ্চিত কৰা হয়।”
টীয়ক সমষ্টিৰ পৰা অগপ দলৰ হৈ জড়িত থকা বা অতদিনে দলটোৰ হৈ কাম কৰি অহা এজন প্ৰাৰ্থী দিয়া হ’লে নিশ্চয় ভাল হ’লহেঁতেন বুলি বৰাই দাবী কৰে।
নিৰ্বাচনী প্ৰচাৰৰ সন্দৰ্ভত তেওঁ কয় “নিৰ্বাচনৰ পূৰ্বেহে ভোটৰ বাবে চাহ বাগানসমূহলৈ যায় কিন্তু তাৰ পূৰ্বে এই চাহ বাগানসমূহলৈ যাবলৈও সময় নাথাকে এই নেতাসকলৰ।”
‘চৰকাৰী টকা ৰাস্তা পদূলি বনাবৰ বাবে দিলেও কিন্তু এতিয়ালৈকে ৰাস্তাত ডাঙৰ ডাঙৰ গাত দেখা পোৱা যায়। নিৰ্বাচনৰ আগে আগে জন প্ৰতিনিধি হয় আৰু নিৰ্বাচনৰ পাছত জনৰজা হৈ যায়।” তেওঁ এইদৰে কয়।
উল্লেখযোগ্য যে, প্ৰাৰ্থীত্বৰ পৰা বঞ্চিত সকলোৱে এইদৰে ক্ষোভ উজৰা পৰিলক্ষিত হৈছে। আনকি কালি নিশাৰ ভাগত টীয়কৰ ৰাজপথত বিজেপিৰ পৰা সমষ্টিটো অগপক গতাই দিয়াত বিজেপি কৰ্মীয়ে ৰঞ্জিত দাস হুচিয়াৰ, হিমন্ত বিশ্ব মুৰ্দাবাদ ধ্বনিৰে উত্তাল প্ৰতিবাদ সাৱ্যস্ত কৰা দেখা যায়৷
