অসম আন্দোলনৰ জৰিয়তে ইতিহাস সৃষ্টিকাৰী পটভূমিৰে জন্মলাভ কৰা অসম গণ পৰিষদ নিজেই এতিয়া ইতিহাস হৈ যাবলৈ ওলাইছে নেকি?
অসমৰ জাতীয়তাবাদী আঞ্চলিক শক্তিক প্ৰতিনিধিত্ব কৰা দলটোক লৈ ইতিমধ্যে যেন স্বপ্নভংগ ঘটিছে অসমৰ জনসাধাৰণৰ।
অসম গণ পৰিষদৰ বোকোচাত উঠিয়েই বিজেপিয়ে অসমত ক্ষমতা দখল কৰিলে। আৰু সেই অসম গণ পৰিষদ দলে এতিয়া নিজ দলৰ বাবে নিৰ্বাচনত প্ৰাৰ্থিত্ব দিবলৈকো বিজেপিৰ মুখলৈ চাবলগীয়া হৈছে।
অসমৰ জনসাধাৰণৰ আশা-আকাংক্ষাৰ প্ৰতিনিধিত্বকাৰী দলটো দিল্লীৰ বহতীয়া হোৱাৰ এই সন্ধিক্ষণত অসমৰ জনসাধাৰণে সঁচাকৈয়ে বিশ্বাসঘাতকতাৰ দৃষ্টান্ত দেখি নিজকে ধিক্কাৰ দিবলৈ লৈছে।
অসমীয়াৰ বিড়ম্বনা এইয়ে যে নিজৰ জাতীয়তাবাদী নেতাসকলে (তথাকথিত) নিজৰ স্বাভিমান ত্যাগ কৰি ৰাষ্ট্ৰীয়তাবাদৰ নামাৱলী পিন্ধিছে।
কিন্তু কিয় ধৰি ৰাখিব নোৱাৰিলে অসমীয়াৰ আৱেগ-অনুভুতিৰ মৰ্যাদা?
ক্ষমতাৰ খকত কিয় বিসৰ্জন দিবলগীয়া হ’ল জাতিৰ স্বাৰ্থ?
এটা এটাকৈ দলৰ পৰা নিষ্ঠাৱান নেতা-কৰ্মীসকল ওলাই যোৱাৰ পাছতো ক্ষমতাৰ চকী খামুচি ধৰি থকা নেতা কেইগৰাকীয়ে দৰাচলতে কাৰ শ্ৰুতলিপিত কাম কৰিছে সেয়া ৰাইজে উপলব্ধি কৰিব পাৰিছে।
বিজেপিয়ে ভালদৰেই জানে যে অগপৰ ‘সৰ্বনাশ’য়েই বিজেপিৰ উত্থানৰ পথ প্ৰশস্ত কৰিব। সেয়ে, অগপৰ ক্ষমতালিপ্সু নেতাকেইগৰাকীক লৈ বিজেপিয়ে আৰম্ভ কৰিলে ক্ষমতা প্ৰাপ্তিৰ কৌশল। সফলো হ’ল বহুখিনি।
ৰাজ্যত চৰকাৰ গঠন কৰাৰ পাছৰে পৰা অগপক ‘লেমটৌ’ কৰি লৈ আগবাঢ়িল বিজেপি। লাহে লাহে অগপত ভাঙোনৰ জালো পেলালে। ‘বিবাহ ভৱন’ নহ’লেও অগপৰ কাৰ্যালয়ত এতিয়া পৰ দি থকা কেইগৰাকীমানৰ বাহিৰে নেতা-কৰ্মী বুলিবলৈকে নাই।
বিজেপিয়ে নিজৰ ইচ্ছামতে এটাৰ পাছত আন এটা ৰণনীতি তৈয়াৰ কৰি আগবাঢ়িছে। ইপিনে মিত্ৰতাৰ ‘নাগপাশ’ত বান্ধ খাই পৰা অগপই মুক দৰ্শক হৈ কেবল চাই ৰৈছে।
বিজেপিয়ে চলোৱা প্ৰচাৰ অভিযানৰ ধুমুহাত অগপক বিচাৰি পোৱাই কঠিন হৈ পৰিছে। নিৰ্বাচনী ৰাজনীতিত একেবাৰে ‘পৰজীৱি’ লতাৰ দৰে হৈ পৰিছে আঞ্চলিক দলটো।
নিৰ্বাচনী ইস্তাহাৰখনো নুলিয়ালেই নহয় কাৰণেহে যেন উলিয়াইছে অগপই। অসমীয়া জাতিৰ স্বাৰ্থত ক’বলৈ বুলি এতিয়া অগপৰ হাতত যেন কোনো বিষয়েই নাই। আঞ্চলিক জাতীয়তাবাদী দলটোৱে আনকি নাগৰিকত্ব সংশোধনী আইনৰ বিষয়টোও উল্লেখ কৰাৰ সাহস গোটাব নোৱাৰিলে।
বিজেপিৰ ৰাষ্ট্ৰীয়তাবাদৰ আগত নিজৰ ক্ষুদ্ৰ জাতি সত্ত্বাৰ স্বাৰ্থ সমুলঞ্চে ত্যাগ কৰি অসমীয়া জাতিৰ বিশ্বাসঘাতক দললৈ পৰিণত হৈছে অগপ!
‘জয় আই অসম’ কবলৈকো টান পোৱা অগপৰ নেতাকেইজনে এনেদৰে হয়তো এদিন নিজৰ অস্তিত্বৰ বাবেও যুঁজ দিবলগীয়া হ’ব।
বিজেপিয়ে ‘সভ্যতাৰ যুঁজ’ আৰম্ভ কৰিছে। এই সভ্যতাৰ যুঁজ আচলতে অসমৰ সভ্যতা ধ্বংস কৰি ‘দেচোৱালি’ সভ্যতা স্থাপনৰ যুঁজ। ইয়াত জাতীয় ভাৱাবেগ বা স্বাভিমান, জাতি-মাটি-ভেটি-ৰক্ষাৰ স্থান নাই। আছে মাথোঁ কৃত্ৰিম শ্ল’গানৰ জৰিয়তে অসমীয়াৰ আৱেগ জয় কৰাৰ কৌশল।
এনেকৈয়ে এদিন বিজেপিৰ ‘সভ্যতাৰ যুঁজ’ত ইতিহাসত পৰিণত হ’বগৈ অসম গণ পৰিষদ নামৰ দলটো। সেই ইতিহাসৰ সাক্ষী হ’বলৈ অসমীয়াৰ দুৰ্ভাগ্য সন্নিকট।
