অসমত লোকসভা নিৰ্বাচন শেষ হোৱাৰ পিছত ৰাজ্যখনৰ আঞ্চলিক দল অগপৰ প্ৰথমখন বিধায়িনী দলৰ বৈঠক আজি অসম বিধানসভাৰ বিধায়িনী কক্ষত অনুষ্ঠিত হৈছে।
খন্তেক সময়ৰ পূৰ্বে আৰম্ভ হোৱা বৈঠকত কেৱল প্ৰফুল্ল কুমাৰ মহন্তৰ বাদে আটাইকেইজন বিধায়ক উপস্থিত আছে।
সভাপতি অতুল বৰা, বৃন্দাবন গোস্বামী, ৰমেন্দ্ৰ নাৰায়ণ কলিতা, ৰেণুপমা ৰাজখোৱা, উৎপল দত্ত, নৰেন সোণোৱাল, ভৱেন্দ্ৰ নাথ ভৰালী, সত্যব্ৰত কলিতা, প্ৰদীপ হাজৰিকা, পবিন্দ্ৰ ডেকা, কেশৱ মহন্ত, ফণীভূষণ চৌধুৰী আৰু গুণীন দাসকে ধৰি মুঠ ১৩জন বিধায়ক উপস্থিত আছে।
প্ৰাক্তন মুখ্য মন্ত্ৰী প্ৰফুল্ল কুমাৰ মহন্তৰ অনুপস্থিতিৰ কাৰণ তেওঁৰ দুই পুত্ৰৰ উপনয়ন অনুষ্ঠান বুলি এটা সূত্ৰৰ পৰা জানিব পৰা গৈছে।
অৱশ্যে আন এটা সূত্ৰই দাবী কৰিছে যে মহন্ত উপস্থিত থাকিব নোৱৰা দিন এটাকে এই গুৰুত্বপূৰ্ণ বৈঠক অনুষ্ঠিত কৰাৰ বাবে বাচি লৈথে বুলি ভৱাৰ থল আছে। কাৰণ পুত্ৰৰ উপনয়নৰ দিন বহুদিন পূৰ্বেই নিৰ্ধাৰিত আছিল।
কাইলৈ অৰ্থাৎ ১৪ মে’ত অগপৰ বৰ্ধিত কাৰ্যনিৰ্বাহক বৈঠক অনুষ্ঠিত হ’ব। তাতো মহন্ত উপস্থিত নথকাৰ সম্ভাৱনাই বেছি, সূত্ৰটোৱে কয়।
