এনেকৈয়ো আহে মৃত্যু! চাহৰ দোকানতে আছিল শুই; বিমান ভাঙি পৰাৰ পিছত মাকৰ সন্মুখতে অগ্নিদগ্ধ হৈ মৃত্যু কিশোৰৰ

আহমেদাবাদৰ মেঘানিনগৰ মেডিকেল কলেজ হাস্পতালৰ হোষ্টেলত দুৰ্ঘটনাগ্ৰস্ত হয় এয়াৰ ইণ্ডিয়া AI171 বিমান। দ্ৰুতগতিত বিয়পি পৰে জুই। এই মাৰাত্মক অগ্নিকাণ্ডত স্থানীয় কেইবাজনো বাসিন্দাৰ অগ্নিদগ্ধ হৈ মৃত্যু হয়।

মেঘানিনগৰৰ মহিলা চাহ দোকানীৰ ১৬ বছৰীয়া পুত্ৰও নিহতসকলৰ ভিতৰত আছে। মাকৰ চকুৰ সন্মুখতে অগ্নিদগ্ধ হৈ মৃত্যু হয় কিশোৰটিৰ।

দুপৰীয়া গ্ৰাহক কম আছিল। মাক সীতাবেনৰ চাহৰ দোকানত পুত্ৰ আকাশ শুই আছিল। সেই সময়ত বিমানখন তীব্ৰ শব্দৰে দুৰ্ঘটনাগ্ৰস্ত হয়। অঞ্চলটোত বিয়পি পৰে অগ্নিকাণ্ড। কেইছেকেণ্ডমানৰ ভিতৰতে সমগ্ৰ অঞ্চলটোলৈ জুই বিয়পি পৰে।

সীতাবেনৰ গাতো জুই লাগি যায়। তথাপি তেওঁ পুত্ৰক বচাবলৈ উন্মাদভাৱে দৌৰি যায়। অৱশ্যে তেতিয়ালৈকে কিশোৰজনক জুইৰ শিখাই আগুৰি ধৰিছিল। তেওঁ সন্তানক মৃত্যুৰ পৰা কোনোমতে বচাব নোৱাৰিলে। গুৰুতৰ অৱস্থাত মহিলাগৰাকীক চিকিৎসালয়ত ভৰ্তি কৰোৱা হৈছে। তেওঁৰ অৱস্থাও সংকটজনক বুলি জানিব পৰা গৈছে।

প্ৰত্যক্ষদৰ্শীয়ে কয় যে গৰমৰ দুপৰীয়াটোত সিদিনা আকাশৰ পৰা যেন এটা জুইৰ আঙনি সৰি পৰিছিল। মেডিকেল কলেজ হোষ্টেলৰ আশে-পাশে থকা অঞ্চলটো জ্বলি উঠিছিল। এই ঘটনাৰ ফলত কেৱল ড্ৰিমলাইনাৰ বিমানখনৰ যাত্ৰীয়ে নহয়, ক্ষতিগ্ৰস্ত হোষ্টেল আৰু ইয়াৰ আশে-পাশে থকা কেইবাজনো লোকৰ মৃত্যু হয়। কামত ব্যস্ত স্থানীয় লোক জুইত জ্বলি ছাই হৈ গৈছে।

জানিব পৰা মতে, এই ভয়ংকৰ দুৰ্ঘটনাত ২৪১ জন যাত্ৰীকে ধৰি মুঠ মৃত্যুৰ সংখ্যা ২৭৪ লৈ বৃদ্ধি পাইছে। কিন্তু এই তথ্য অসমৰ্থিত সূত্ৰৰ পৰা পোৱা গৈছে। আনুষ্ঠানিকভাৱে মৃত্যু হোৱা লোকৰ সংখ্যা এতিয়াও জানিব পৰা হোৱা নাই।