মংগলবাৰে লোকসভাত ৰাষ্ট্ৰপতিৰ ভাষণ বিৰ্তকত অংশগ্ৰহণ কৰি দিয়া ভাষণত কংগ্ৰেছ নেতা তথা সাংসদ ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদী আৰু বিতৰ্কিত উদ্যোগপতি গৌতম আদানীৰ দুখনমান পুৰণি ফটো প্ৰদৰ্শন কৰে।
ফটোকেইখন হৈছে আদানীৰ ব্যক্তিগত বিমানত তেতিয়াৰ গুজৰাটৰ মুখ্যমন্ত্ৰী নৰেন্দ্ৰ মোদীয়ে গৌতম আদানীৰে নিৰ্বাচনী সভাত অংশগ্ৰহণৰ উদ্দেশ্য যাত্ৰা কৰাৰ সময়ৰ। সেই ফটোগ্ৰাফ প্ৰদৰ্শন কৰি কংগ্ৰেছ নেতা ৰাহুল গান্ধীয়ে কয় যে গৌতম আদানী আৰু প্ৰধানমন্ত্ৰী নৰেন্দ্ৰ মোদীৰ সম্পৰ্ক অতি পুৰণি আৰু ২০১৪ চনত নৰেন্দ্ৰ মোদীয়ে দেশৰ প্ৰধানমন্ত্ৰী হোৱাৰ পাছৰে পৰা গৌতম আদানীৰ ব্যৱসায় দুপদুপাই বৃদ্ধি পাইছে।
নৰেন্দ্ৰ মোডী চৰকাৰক তীব্ৰ আক্ৰমণ কৰি প্ৰাক্তন কংগ্ৰেছ সভাপতি ৰাহুল গান্ধীয়ে লগতে কয় যে আদানীক কোনো অভিজ্ঞতা নোহোৱাকৈ দেশৰ বিমানবন্দৰসমূহৰ লগতে ইজৰাইলৰ সৈতে প্ৰতিৰক্ষা মন্ত্ৰণালয়ৰ যুদ্ধাস্ত্ৰ ক্ৰয়ৰ ঠিকা গতাই দিয়া হৈছে। প্ৰধানমন্ত্ৰী নৰেন্দ্ৰ মোদী চৰকাৰৰ বিৰুদ্ধে আৰু বহু বিস্ফোৰক অভিযোগ উত্থাপন কৰিছে কংগ্ৰেছ নেতা ৰাহুল গান্ধীয়ে।
ৰাহুল গান্ধীৰ দাবী যে প্ৰধানমন্ত্ৰী মোদীয়ে অষ্ট্ৰেলিয়াৰ ভ্ৰমণৰ পাছতে গৌতম আদানীক ভাৰতীয় ষ্টেট বেংকে ১ বিলিয়ন ডলাৰ টকা ঋণ প্ৰদান কৰে। উল্লেখ্য যে আদানীৰ প্ৰতিষ্ঠানেই হৈছে অষ্ট্ৰেলিয়াৰ সৰ্ববৃহৎ কলয়া খনন প্ৰতিষ্ঠান।
ইফালে প্ৰধানমন্ত্ৰী মোদীয়ে বাংলাদেশ আৰু শ্ৰীলংকা ভ্ৰমণ কৰি অহাৰ পাছতে উক্ত দুয়ো দেশৰ লগত গৌতম আদানীৰ প্ৰতিষ্ঠানে বৃহৎ শক্তি বিতৰণৰ চুক্তিত স্বাক্ষৰ কৰা বুলিও ৰাহুল গান্ধীয়ে অভিযোগ কৰে।
ৰাহুল গান্ধীয়ে আদানীৰ ব্যক্তিগত বিমানত বহি থকা প্ৰধানমন্ত্ৰী নৰেন্দ্ৰ মোডী আৰু গৌতম আদানীৰ পুৰণি ফ’টো দেখুৱাই প্ৰশ্ন কৰে— “প্ৰধানমন্ত্ৰী মোদীৰ সৈতে আদানীৰ সম্পৰ্ক কি? ২০১৪ চনৰ পৰা ২০২২ চনলৈ আদানী ৮০ বিলিয়ন ডলাৰৰ পৰা ১৪০ বিলিয়ন ডলাৰৰ গৰাকী কেনেকৈ হ’ল। ২০১৪ চনত তেওঁ বিশ্বৰ ধনী লোকসকলৰ ভিতৰত ৬০৯ নম্বৰ স্থান লাভ কৰিছিল। কি যাদুৰ বলত তেওঁ বিশ্বৰ দুই ধনী ব্যক্তিত পৰিণত হ’ল?”
ইফালে ৰাহুল গান্ধীৰ ভাষণ প্ৰদান কৰি থকাৰ সময়ত হট্টগোল কৰি শাসকীয় দলৰ সদস্যসকলে ভাষণ প্ৰদানত বাধা আৰোপ কৰিবলৈ চেষ্টা কৰে। আনকি বিজেপিৰ সাংসদ আৰু মন্ত্ৰীসকলে ৰাহুল গান্ধীক প্ৰধানমন্ত্ৰী নৰেন্দ্ৰ মোদীৰ বিৰুদ্ধে ভিত্তিহীন অভিযোগ উত্থাপন কৰা বুলি কৈ ক্ষমা খুজিবলৈও দাবী কৰে।
