কংগ্ৰেছ সভাপতি ৰাহুল গান্ধী গুৱাহাটীত উপস্থিত : এপ’ল হাস্পাতলত খৱৰ ল’লে অৰুণাচলত আৰক্ষীৰ গুলীত আহত প্ৰতিবাদকাৰীৰ
নিখিল ভাৰত কংগ্ৰেছ সমিতিৰ সভাপতি ৰাহুল গান্ধী আহি আজি গুৱাহাটীত উপস্থিত হৈছে। দিনৰ ১২-৩০ বজাত বিমানেৰে আহি ৰাহুল গান্ধী বৰঝাৰৰ লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰত উপস্থিত হয়।
বৰঝাৰ বিমানবন্দৰত উপস্থিত হোৱাৰ পাছতে কংগ্ৰেছ সভাপতিগৰাকীক ৰাজ্যৰ শীৰ্ষ কংগ্ৰেছী নেতাসকলে আদৰণি জনায়।
বিমানবন্দৰত ৰাহুল গান্ধীক আদৰণি জনায় প্ৰাক্তন মুখ্য মন্ত্ৰী তৰুণ গগৈ, অসম প্ৰদেশ কংগ্ৰেছ সমিতিৰ তত্ত্বাৱধায়ক হৰিশ ৰাৱাট, প্ৰদেশ কংগ্ৰেছৰ সভাপতি ৰিপুন বৰা, ৰকিবুল হুছেইন প্ৰমুখ্যে নেতাসকলে।
কংগ্ৰেছ সভাপতি ৰাহুল গান্ধীয়ে বিমানবন্দৰৰ পৰা পোনে পোনে এপ’ল হাস্পাতালত আহি উপস্থিত হয়। হাস্পাতলত গান্ধীয়ে অৰুণাচলত আৰক্ষীৰ হাতত আহত দুগৰাকী প্ৰতিবাদকাৰীৰ খৱৰ লয়।
হাস্পাতালখনত কংগ্ৰেছ সভাপতিগৰাকীক সংগ দিয়ে বিৰোধী দলপতি দেবব্ৰত শইকীয়া, সাংসদ ভুৱনেশ্বৰ কলিতা, প্ৰাক্তন মন্ত্ৰী গৌতম বৰা আৰু ৰকিবুল হুছেইনে। অৱশ্যে, এছপিজিৰ নিৰ্দেশ অনুসৰি অকল ৰাহু গান্ধীয়েহে প্ৰতিবাদকাৰীৰ খৱৰ লয়। বাকী কংগ্ৰেছী নেতসকলক এছপিজিয়ে প্ৰৱেশত বাধা দিয়ে।
ইপিনে, অৰুণাচল কংগ্ৰেছৰ সভাপতি তাকাম সঞ্জয়ে সংবাদ মাধ্যমক জানিবলৈ দিয়ে যে ৰাহুল গান্ধীয়ে আহত লোক দুজনৰ স্বাস্থ্যৰ বুজ লোৱাৰ লগতে তেওঁলোকৰ পৰিয়ালৰ লোকৰ সৈতেও কথা পাতে। তদুপৰি, ৰাহুল গান্ধীয়ে নিহত লোক দুজনৰ আত্মাৰ শান্তি কামনাৰে ভগবানৰ ওচৰত প্ৰাৰ্থনা জনায়।
ইয়াৰ পাছতে ৰাহুল গান্ধী পোনো পোনে গৈ খানাপাৰাৰ জনসভাত উপস্থিত হয়। ইয়াত তেওঁ বুথকৰ্মীৰ এখন সভাত ভাষণ প্ৰদান কৰি অসমত আনুষ্ঠানিকভাৱে নিৰ্বাচনী প্ৰচাৰৰ শুভাৰম্ভ কৰিব। আনহাতে, বিয়লি কলাক্ষেত্ৰত NECCCৰে বৈঠকত মিলিত হোৱাৰ পাছত সন্ধিয়া পুনৰ দিল্লীলৈ উভতি যাব কংগ্ৰেছ সভাপতিজন।