শেহতীয়াকৈ চৰকাৰে ‘কা’ সংশোধনৰ জড়িয়তে ২০২৪ৰ ৩১ ডিচেম্বৰৰ পূৰ্বে অহা লোকক নাগৰিকত্ব দিবলৈ চৰকাৰ উঠি-পৰি লাগিছে তাৰ তীব্ৰ সমালোচনা কৰিছে ৰাজ্যসভাৰ সাংসদ অজিত কুমাৰ ভূঞাই। অসমৰ সভ্যতা সংস্কৃতিৰ প্ৰতি ন্যূনতম সংবেদনশীলতা থকা মানুহে এই নিৰ্দেশ মানি লব নোৱাৰে বুলি উল্লেখ কৰে সাংদজনে। লগতে চৰকাৰৰ এই নীতিক ভয়ংকৰ ষড়যন্ত্ৰ বুলিও আখ্যা দিয়ে ৰাজ্যসভাৰ সাংসদজনে। ভাৰত চৰকাৰৰ এই পদক্ষেপক সমালোচনা কৰিবলৈ গৈ নিজকে ভাষাহীন বুলিও উল্লেখ কৰে ভূঞাই। জাতি, মাটি, ভেটিৰ দোহাই দি ক্ষমতালৈ অহা বিজেপি দলটোৱে অসমীয়া মানু্হক প্ৰতাৰণা কৰিছে বুলিও ভূঞাই বিজেপি চৰকাৰক তীব্ৰ কটাক্ষ কৰে।
তদুপৰি ভূঞাই কেন্দ্ৰীয় চৰকাৰে অসমক পৰীক্ষাগাৰ হিচাপে বুলি মন্তব্য কৰে। অসমৰ বহু জাতীয় সংগঠনে ‘কা’ৰ বিৰোধিতাত আন্দোলন কৰিছিল যদিও এতিয়া একাংশই চৰকাৰৰ জালত ভৰি থৈ বিপথে পৰিচালিত হৈছে বুলি ভূঞাই উল্লেখ কৰে।
অসমৰ মাটি গুজৰাটী বনিয়া আৰু গৌতম আদানীক দিয়াক লৈয়ো সৰৱ হৈ পৰে সাংসদ ভূঞা। অসমৰ ষষ্ঠ অনুসূচীৰ ভূমি বহিৰাগতৰ হাতত গটাই মুখ্যমন্ত্ৰীয়ে মূল ইচ্ছ্যু বিপথে পৰিচালিত কৰিবলৈ শ্ৰীমন্ত শংকৰদেৱ, জ্যোতিপ্ৰসাদ আগৰৱালা, বিষ্ণু ৰাভাৰ অসমত সাম্প্ৰদায়িক বিষবাষ্প বিয়পাবলৈ চেষ্টা কৰা বুলিও সাংসদজনে উল্লেখ কৰে। লগতে ভূঞাই চৰকাৰ বৰ্তমান অসমত থকা বিদেশী চিনাক্ত কৰি প্ৰত্যাৱৰ্তনৰ পৰিৱৰ্তে স্বদেশী সজাৰ কাৰচাজিত লিপ্ত হৈছে বুলি অভিযোগ উত্থাপন কৰে। তদুপৰি সাংসদ অজিত কুমাৰ ভূঞাই চৰকাৰৰ এই কাৰ্যৰ বাবে ৰাইজৰ হাতত ৰাজপথৰ আন্দোলনৰ বিকল্প নাই বুলি স্পষ্ট কৰে।
