তিনিচুকীয়া জিলাৰ বৰডুমচাত অসম আৰক্ষীয়ে সংঘটিত কৰিছে অমানুষিককাণ্ড। সঞ্জীৱ মৰাণ নামৰ এজন স্থানীয় নিৰীহ যুৱকক থানালৈ আনি বন্ধ কোঠাত বন্দী কৰি গোটেই নিশা তালিবানী শাস্তি দিলে বৰডুমচা আৰক্ষীয়ে।
জানিব পৰা মতে, যুৱকজনক উলংগ কৰি শৰীৰত ভোট জলকীয়া সানি দিয়াৰ লগতে উপৰ্যুপৰি প্ৰহাৰ কৰে কেইবাজনো আৰক্ষী জোৱানে।
এই ঘটনাক অসমৰ জাতীয় দল-সংগঠনে গৰিহণা জনোৱাৰ লগতে ৰাজ্যসভাৰ সাংসদ অজিত কুমাৰ ভূঞায়ো ক্ষোভ প্ৰকাশ কৰি ন্যায়ৰ দাবী জনাইছে।
নৰ্থ-ইষ্ট নাওলৈ প্ৰেৰণ কৰা এক বিবৃত্তিত সাংসদ ভূঞাই কয়, “ বৰডুমচা থানাত মাজনিশা সঞ্জীব মৰাণ নামৰ যুৱকজনক পুলিচে আইন হাতত লৈ যি নিৰ্মম অত্যাচাৰ কৰিলে, তাক নিন্দা কৰাৰ কোনো ভাষা বিচাৰি পোৱা নাই। এগৰাকী যুৱকক ইমান নিৰ্মমভাবে মাৰপিট কৰাৰ অধিকাৰ পুলিচক কোনে দিলে? কোনোবাই কিবা দোষ কৰিছে, কিবা ভূল কৰিছে – সেইয়া বিচাৰ কৰিবলৈ আইন / আদালত আছে। পুলিচে ঠাইতে এনে অবৈধ শাস্তি দিবলৈ কোন? ”
মুখ্যমন্ত্ৰী হিমন্ত বিশ্ব শৰ্মাক লক্ষ্য কৰি সাংসদ অজিত কুমাৰ ভূঞাই কয়, “ মুখ্যমন্ত্ৰী হিমন্ত বিশ্ব শৰ্মাৰ নেতৃত্বত এতিয়া অসম পুলিচৰ এক পেটাৰ্ন গঢ় লৈ উঠিছে । ঠাইতেই বিচাৰ কৰা ! মূখ্যমন্ত্ৰীৰ প্ৰায় ব্যক্তিগত সম্পত্তিত পৰিণত হোৱা অসম পুলিচৰ এই পেটাৰ্ন অবৈধ আৰু ইয়াৰ ফলত বহু নিৰীহই মিছাতে অত্যাচাৰ সহ্য কৰিবলগীয়া হৈছে। সেয়ে অসমত সম্প্ৰতি গুণ্ডাৰাজ চলা বুলি সচেতন মহলে কবলৈ বাধ্য হৈছে। মোৰ দাবী, অসম পুলিচে এই পেটাৰ্ন শীঘ্রেই বন্ধ কৰিব লাগে। পুলিচৰ পৰা ৰাইজে ন্যায়হে দাবী কৰে, অত্যাচাৰ নহয়।”
সঞ্জীৱ মৰাণৰ মাৰপিটৰ লগত জড়িত প্রত্যেকজন আৰক্ষীক শীঘ্রেই গ্ৰেপ্তাৰ কৰিবলৈ গৃহ বিভাগক দাবী জনাইছে সাংসদ অজিত কুমাৰ ভূঞাই।
