সদ্য ঘোষিত পঞ্চায়ত আৰু গ্ৰামোন্নয়ন বিভাগৰ নিযুক্তিৰ ফলাফলত ব্যাপক অনিয়ম হোৱাৰ অভিযোগ তুলি অসম জাতীয়তাবাদী যুৱ ছাত্ৰ পৰিষদে আজি তিনিচুকীয়া জিলাৰ মাৰ্ঘেৰিটাত তীব্ৰ প্ৰতিবাদ সাব্যস্ত কৰে।
প্ৰতিবাদকাৰীসকলে মাৰ্ঘেৰিটা মহকুমাৰ লিডুৰ কলেজ তিনিআলিস্থিত ৩৮ নং ৰাষ্ট্ৰীয় ঘাইপথত মন্ত্ৰী নৱ দলেৰ পুত্তলিকা দাহ কৰাৰ লগতে বিজেপি, আৰ এছ এছৰ আত্মীয়ক প্ৰদান কৰা নিযুক্তি প্ৰক্ৰিয়া বাতিল কৰি পুনৰ পৰীক্ষা অনুষ্ঠিত কৰিবলৈ দাবী জনায়।
মাৰ্ঘেৰিটা আঞ্চলিক সমিতিৰ সম্পাদক বিমল সিঙৰ নেতৃত্বত সংগঠনটোৰ শতাধিক সদস্যই উক্ত প্ৰতিবাদী কাৰ্যসূচীত অংশগ্ৰহণ কৰে। ৰাষ্ট্ৰীয় ঘাইপথ অৱৰোধ কৰি সাব্যস্ত কৰা এই প্ৰতিবাদৰ ফলত কিছু সময়ৰ বাবে অঞ্চলটোত যানজঁটৰো সৃষ্টি হয়৷
উল্লেখযোগ্য যে এই নিযুক্তি প্ৰক্ৰিয়াত ভয়ংকৰ কেলেংকাৰি সংঘটিত হোৱা বুলি বিভিন্ন মহল তথা সংবাদ মাধ্যমত চৰ্চিত হোৱাৰ পাছতে এই সমগ্ৰ বিষয়টো তদন্ত কৰিবলৈ মুখ্য মন্ত্ৰী সৰ্বানন্দ সোণোৱালে ৰাজ্য চৰকাৰৰ অতিৰিক্ত মুখ্য সচিব জিষ্ণু বৰুৱাক দায়িত্ব প্ৰদান কৰিছিল।
