শুকুৰবাৰে অনুষ্ঠিত হ’বলগীয়া বিক্ষোভ কাৰ্য্যসূচী তথা প্ৰতিবাদী সভাখন অনুষ্ঠিত কৰাত প্ৰশাসনে বাধা আৰোপ কৰিলে ৭০ টা সংগঠনৰ ফালৰ পৰা পুনৰবাৰ ব্যাপক অসম বন্ধৰ কাৰ্য্যসূচী ঘোষণা কৰিবলৈ বাধ্য হ’ব বুলি বৃহস্পতিবাৰে সংবাদমেলত ঘোষণা কৰে অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক পলাশ চাংমাইয়ে।
উল্লেখযোগ্য যে, যোৱা ২৩ অক্টোবৰত ৬০ টা জাতীয় সংগঠনে দিয়া অসম বন্ধ ১২ ঘন্টীয়া আছিল যদিও আগন্তুক অসম বন্ধটো ২৪ ঘন্টীয়া অথবা তাতকৈও বেছি সময়ৰ বাবে হ’ব বুলি তেওঁ সংবাদমেলত কয়।
তেওঁ উক্ত সংবাদ মেলত বিজেপি চৰকাৰ তথা ৰাজ্যৰ প্ৰশাসনক কটাক্ষ কৰি কয়, ‘’এখন গণতান্ত্ৰিক দেশত প্ৰাপ্য অধিকাৰৰ কাৰণে তথা জাতিটোক ৰক্ষা কৰিবৰ কাৰণে কৰা গণতান্ত্ৰিক প্ৰতিবাদক মষিমুৰ কৰাৰ চেষ্টা কৰিছে বিজেপি চৰকাৰে।‘‘
তেওঁ লগতে আৰক্ষী সঞ্চালক প্ৰধান কুলধৰ শইকীয়াৰ প্ৰতি প্ৰশ্ন উত্থাপন কৰি সংবাদমেলত কয়, ‘’যোৱা ১১ নৱেম্বৰৰ পৰা ১৫ নৱেম্বৰলৈকে গণতান্ত্ৰিকভাৱে তথা কোনো আইন শৃংখলাজনিত পৰিবেশৰ সৃষ্টি নকৰাকৈ প্ৰতিবাদী সমদল কৰি অহাৰ পাছতো ১৬ নৱেম্বৰত সভা অনুষ্ঠিত কৰিবলৈ অনুমতি দিয়া নহ’ল?’
এই কথাক দুৰ্ভাগ্যজনক আখ্যা দিয়ে অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক জনে।
আনহাতে, গণতান্ত্ৰিকভাৱে প্ৰতিবাদ কৰিও সেই প্ৰতিবাদৰ ভাষা বুজি নোপোৱা চৰকাৰখনে প্ৰতিবাদকাৰীসকলক অগণতান্ত্ৰিক পদ্ধতি ল’বলৈ বাধ্য কৰাব নেকি বুলিও সংবাদমেলত তেওঁ ৰাজ্য চৰকাৰ-প্ৰশাসনক প্ৰশ্ন কৰে।
