ভাৰতীয় ক্ৰিকেট দলৰ প্ৰাক্তন ক্ৰিকেটাৰ তথা বৰ্তমানৰ জনপ্ৰিয় ধাৰাভাষ্যকাৰ আকাশ চোপ্ৰাই সুৰেশ ৰাইনাৰ অৱসৰ সন্দৰ্ভত মত ব্যক্ত কৰিছে।
সুৰেশ ৰাইনাই পাকিস্তানৰ চাহিদ আফ্ৰিডিৰ নিচিনাকৈ অৱসৰ ভংগ কৰি পুনৰ ক্ৰিকেটৰ পথাৰলৈ উভতি আহিব লাগে বুলি আকাশ চোপ্ৰাই মন্তব্য কৰে।
”মই বিশ্বাস কৰো যে ২০২০ আৰু ২০২১ বৰ্ষৰ আই পি এলত ৰাইনাৰ দুৰ্দান্ত প্ৰদৰ্শনৰ বাবে ক্ৰিকেটাৰ গৰাকীয়ে ভাৰতীয় টি২০ বিশ্বকাপ দলত নিজৰ নাম অন্তৰ্ভূক্ত কৰিব,” আকাশ চোপ্ৰাই এইদৰে কয়।
উল্লেখযোগ্য যে, পাকিস্তানৰ প্ৰাক্তন ক্ৰিকেটাৰ চাহিদ আফ্ৰিডিয়ো বহুবাৰ অৱসৰ ঘোষণা কৰিছিল আৰু পৰৱৰ্তী সময়ত অৱসৰ ভংগ কৰি খেলপথাৰলৈ উভতি আহিছিল।
সুৰেশ ৰাইনাই ভাৰতীয় ক্ৰিকেট দলৰ বিশ্বকাপ বিজয়ী অধিনায়ক মহেন্দ্ৰ সিং ধোনীৰ সৈতে ১৫ আগষ্টত আন্তঃৰাষ্ট্ৰীয় ক্ৰিকেটৰ পৰা অৱসৰ ঘোষণা কৰিছিল।
মহেন্দ্ৰ সিং ধোনীয়ে আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰাৰ কিছুসময় পাছতে সুৰেশ ৰাইনাইয়ো আন্তঃৰাষ্ট্ৰীয় ক্ৰিকেটক বিদয় জনাইছিল।
