অখণ্ড মণ্ডলীৰ সৰ্বভাৰতীয় পৰ্য্যায়ৰ মহোৎসৱক কেন্দ্ৰ কৰি উদুলি-মুদুলি শৈল চহৰ হাফলং। দেশৰ বিভিন্ন প্ৰান্তৰ পৰা হেজাৰ হেজাৰ ভক্ত প্ৰাণ ৰাইজ গোট খোৱাৰ উপৰিও প্ৰতিবেশী দেশ বাংলাদেশৰ পৰাও ভকতসকলে ভাগ লয়।
হাফলং চৰকাৰী বয়জ এইচ এছ স্কুল খেলপথাৰত অনুষ্ঠিত হৈছে মূল অনুষ্ঠান। অনুষ্ঠানত ভাগ লোৱা কাৰণে কলিকতাৰ পৰা পাৰ্বত্য চহৰ হাফলঙত উপস্থিত হৈছে বৰ্তমান অখণ্ড সংঘ প্ৰধান তপন ব্ৰহ্মচাৰী।
যোৱা দুদিন ধৰি দেশৰ বিভিন্ন প্ৰান্তৰ পৰা ভকতসকল হাফলঙত গোট খাইছে। আজি অনুষ্ঠানৰ অঙ্গ হিচাপে এক বিশাল শোভাযাত্ৰা উলিওৱা হয়। য’ত কেইবা সহস্ৰাধিক ভক্তপ্ৰাণ ৰাইজে ভাগ লোৱাৰ লগতে অখণ্ড সংঘপ্ৰধান তপন ব্ৰহ্মচাৰীয়েও ভাগ লয়।
সজাই-পৰাই উলিওৱা হয় চাৰিখনকৈ ৰথ। মহিলাসকলে ৰঙা আৰু বগা ৰঙৰ শাৰী পৰিধান কৰাৰ বিপৰীতে পুৰুষসকলে বগা ধুতি আৰু পাঞ্জাবী পৰিধান কৰে। শোভাযাত্ৰা হাফলং গাডাঈন ৰাজিত থকা মন্দিৰ চৌহদৰ পৰা আৰম্ভ হৈ হাফলঙৰ প্ৰধান ৰাজপথ পৰিক্ৰমা কৰি কনভেন্ট ৰোড, ৰামনগৰ, বিশ্ব হিন্দু পৰিষদ পথ হৈ মন্দিৰ চৌহদ পায়। হৰি ওম নামেৰে আকাশ বতাহ একাকাৰ হৈ উঠে।
আজিৰ শোভাযাত্ৰাত ডিমাচা, নাগা আদি বিভিন্ন জনগোষ্ঠীয় ৰাইজেও নিজৰ পৰম্পৰাগত সাজপাৰ পৰিধান কৰি ভাগ লয়।
আচলতে পাৰ্বত্য জিলাত আজিৰ দিনত অতীতৰ ক’লা দিন নাই। এতিয়া হাফলঙকে ধৰি জিলাৰ প্ৰতিটো প্ৰান্তত এক সুকীয়া পৰিৱেশ বিৰাজমান। যাৰ কাৰণে এনে এখন সৰ্বভাৰতীয় পৰ্যায়ৰ মহোৎসৱৰ আয়োজন কৰা সম্ভৱপৰ হৈছে। অকল মহোৎসৱ নহয়।
অখণ্ড মণ্ডলীৰ উদ্যোগত এখন সুউচ্চ মন্দিৰ নিৰ্মাণ কৰা হৈছে। অহা ১লা জানুৱাৰিত মহোৎসৱৰ অন্তিম দিনা অখণ্ড সংঘ প্ৰধান তপন ব্ৰহ্মচাৰীৰ হাতেৰে নৱনিৰ্মিত অখণ্ড উপাসনা মন্দিৰৰ দ্বৰোদ্ঘাটন হ’ব।
