সকলো বাগিচাতে ২০ শতাংশ বোনাচ দিবই লাগিব আৰু চাহ উদ্যোগত লোকচান হোৱাৰ দোহাই দি সৰ্বনিম্ন ৮.৩৩ শতাংশ বোনাচ দিয়াটো কোনোপধ্যে মানি লোৱা নহ’ব, এই কথা আজি স্পষ্ট ভাষাত জনাই দিছে অখিল ভাৰতীয় চাহ মজদুৰ সংঘই।
চৰকাৰে কেৱল অসম চাহ নিগমৰ অধীন বাগিচাবোৰত ২০ ঘোষণা কৰাক আভুৱা ভাঁৰা কাৰ্য্য বুলি কয় সংঘই।
আজি অখিল ভাৰতীয় চাহ মজদুৰ সংঘৰ অসম শাখাৰ সম্পাদক দীনেশ নায়কে গুৱাহাটীস্থিত সংঘৰ মুখ্য কাৰ্যালয়ত এখন সংবাদমেল সন্মোধন কৰে।
কিছুদিনৰ পূৰ্বে অসমৰ উদ্যোগ মন্ত্ৰী চন্দ্ৰমোহন পাটোৱাৰীয়ে চাহ উদ্যোগৰ লোকচানৰ দোহাই দি শ্ৰমিকসকলক এইবাৰ পূজাৰ বোনাচ ৮.৩৩ শতাংশকৈহে দিয়াৰ কথা ঘোষণা কৰিছিল। কিন্তু চাহ শ্ৰমিকসকল আৰু তেওঁলোকৰ বিভিন্ন সংগঠনবোৰৰ তীব্ৰ অসন্তুষ্টিৰ পাছত মুখ্য মন্ত্ৰীয়ে অসম চাহ নিগমৰ অন্তৰ্গত বাগিচাসমূহত আগৰ দৰেই ২০ শতাংশ হাৰত বোনাচ দিয়া হ’ব বুলি ঘোষণা কৰে।
দীনেশ নায়কে ইয়াক তথাকথিত ঘোষণা আৰু এক প্ৰহসন আখ্যা দি সকলো বাগিচাতে এই ২০ শতাংশ বোনাছ আগ বঢ়াবলৈ দাবী জনায়।
কেৱল অসম চাহ নিগমৰ অধীনৰ বাগানত দিলে কেইজনে পাব বুলি প্ৰশ্ন কৰি তেওঁ কয়, “অসমত থকা ৮৫৯খন বাগনৰ ১৪খন বাগান হে অসম চাহ নিগমৰ অন্তৰ্গত। বাকী ৮৪৫খন বাগানেই কোম্পানীৰ অন্তৰ্গত”।
বাগিচাবোৰত লোকচান হোৱাৰ কথাটো গোকাট মিছা বুলি দাবী কৰি নায়কে কয়, লোকচানৰ প্ৰশ্নই থাকিব নোৱাৰে। লাভৰ অংশ কম-বেছি হ’ব পাৰে।
“বাগিচাবোৰত লাভ হোৱা বুলি চাহ মালিকে কোনো দিনেই স্বীকাৰ কৰা নাই। তেওঁলোক ইমান দয়ালু যে ঘৰৰ পৰা পইচা আনি শ্ৰমিকক দি আছে। কিন্তু উদ্যোগটোত কোনো প্ৰভাৱ পৰা নাই”, কটাক্ষপূৰ্ণ নায়কৰ মন্তব্য। তেওঁ ইয়াক আভুৱা ভাঁৰা কথা আখ্যা দিয়ে।
ইতিমধ্যে অখিল ভাৰত চাহ মজদুৰ সংঘৰ সপ্তদশ সন্মিলনত কেইবাটাও গুৰুত্বপূৰ্ণ ইচ্ছ্যু হাতত লোৱা বুলি জানিবলৈ দি নায়কে সংবাদমেলত কয় “এই প্ৰথম কথাটো হ’ল মাটিৰ পট্টা দিয়াৰ দাবী। ২০০ বছৰ বাগানবোৰত বাস কৰি অহাৰ পিছতো মাটিৰ অধিকাৰ নহ’ল। চাহ শ্ৰমিকসকলৰ এটা ঘৰ বনাবলৈ একঠা মাটি নাই।“
“প্ৰথমে আমি ভাৰতীয় নাগৰিক। আমাক শ্ৰমিক বুলি ধৰা হয়। কিন্তু আমি প্ৰথমে নাগৰিক। নাগৰিক হিচাপে মাটিৰ অধিকাৰ, শিক্ষাৰ অধিকাৰ এইবোৰ আমাৰ প্ৰাপ্য। কিন্তু আমাক এইবোৰৰ পৰা যুগ যুগ ধৰি বঞ্চিত কৰা হৈছে। চাহ শ্ৰমিকসকলক মানুহ হিচাপে গণ্য কৰা নাই” নায়কে আক্ষেপেৰ কয়।
কংগ্ৰেছ-বিজেপি কোনো চৰকাৰেই তেওঁলোকৰ বাবে একো কৰা নাই বুলি অভিযোগ নায়কৰ।
“চৰকাৰৰ শ্ৰম বিভাগে বিভিন্ন দিশ বিবেচনা কৰি ৩৫১ টকা দৈনিক ন্যূনতম মজুৰি নিৰ্ধাৰণৰ প্ৰস্তাৱ চৰকাৰৰ অনুমোদনৰ বাবে প্ৰেৰণ কৰিছিল। কিন্তু প্ৰায় দুবছৰ পাৰ হৈ যোৱাৰ পাছতো বৰ্তমানেও মুখ্য মন্ত্ৰীগৰাকীয়ে কোনো ব্যৱস্হা গ্ৰহণ নকৰিলে”, নায়কে চৰকাৰখনৰ নিস্পৃহতা উদঙাই কয়।
তেওঁ কয় যে ২০ শতাংশ বোনাছ, ন্যূনতম মজুৰি, মাটিৰ পট্টা এই ইচ্ছ্যুবোৰ লৈ অহা ১২ ছেপ্টেম্বৰত সমগ্ৰ অসমত প্ৰতিবাদী কাৰ্যসূচী ৰূপায়ণ কৰা হ’ব।
অহা নৱেম্বৰৰ ভিতৰত যদি ন্যূনতম মজুৰি কাৰ্যকৰী নহ’লে পৰৱৰ্তী সময়ত অসম বন্ধ, ধৰ্মঘট, ঘেৰাও আদিৰ জৰিয়তে জোৰদাৰ আন্দোলন কৰা হ’ব বুলি সম্পাদকজনে জানিবলৈ দিয়ে।
