“বিজেপিৰ প্ৰত্যেকজন নেতাৰ মুখত চিলাই দি দিয়া হৈছে। এইকাৰণে চিলোৱা হৈছে যে তেওঁলোকে মুখখন মেলিলে অসমৰ ৰাইজে গৰ্ভ দেখা পায়। এতিয়া পদুম ফুলৰ পাহিৰ ভিতৰত ফেঁটি সাপ ওলাইছে। অসমৰ জনগণক তেওঁলোকে খুঁটি মাৰিব খুজিছে”। মূল্যবৃদ্ধিৰ বিৰুদ্ধে প্ৰতিবাদ সাব্যস্ত কৰি বিজেপিৰ বিৰুদ্ধে এইদৰে সৰৱ হৈ পৰে ৰাইজৰ দলৰ সভাপতি তথা বিধায়ক অখিল গগৈ।
উল্লেখযোগ্য যে, দীৰ্ঘদিন বিৰতিৰ মূৰত ৰাজপথত নামি প্ৰতিবাদ সাব্যস্ত কৰা দেখিবলৈ পোৱা গ’ল বিধায়ক অখিল গগৈক।
শুকুৰবাৰে ৰাইজৰ দলে অত্যাৱশ্যকীয় সামগ্ৰী, ঔষধ, পেট্ৰ’ল-ডিজেলৰ মূল্যবৃদ্ধিৰ বিৰুদ্ধে গুৱাহাটী ক্লাৱৰ সন্মুখত প্ৰতিবাদ সাব্যস্ত কৰে।
বিজেপিয়ে আদানী-আম্বানীৰ হাতত দেশখন বিক্ৰী কৰি দিছে বুলি অভিযোগ কৰি অখিল গগৈয়ে লগতে কয়, “বিক্ৰী কৰি দিয়াৰ ফলত গোটেই দেশখনৰ জনসাধাৰণক মূল্যবৃদ্ধিয়ে দহি পেলাইছে। ৪৪১ টকীয়া গেছ চিলিণ্ডাৰৰ দাম আজি ১০০০ টকা হ’লগৈ, ৮০ টকাৰ মিঠাতেলৰ দাম ২২০ টকা হ’লগৈ, ৪৮ টকীয়া মচুৰ দাইলৰ দাম ১১০ টকা হ’লগৈ, ঔষধৰ দাম দুগুণ বৃদ্ধি পালে”।
আনহাতে, মূল্যবৃদ্ধি সন্দৰ্ভত বিজেপি নেতাই মুখ বন্ধ নাৰাখিলে ৰাইজে খেদি খেদি বিজেপি নেতা-কৰ্মীক পিটন দিব বুলি দাবী কৰে বিধায়ক অখিল গগৈয়ে।
মুখ্যমন্ত্ৰী ড০ হিমন্ত বিশ্ব শৰ্মাৰ বিৰুদ্ধে সৰৱ হৈ বিধায়কগৰাকীয়ে কয়, “হিন্দু- মুছলমানৰ ৰাজনীতি কৰি কৰি মানুহক হিমন্ত বিশ্ব শৰ্মাই ঠগাব নোৱাৰিলে। তেওঁ এইবোৰ ৰাজনীতি কৰি জনগণৰ বিপক্ষে গৈছে। হয় বিজেপি চৰকাৰে পদত্যাগ কৰক অন্যথা সামগ্ৰীৰ মূল্যবৃদ্ধি ৰোধ কৰিব লাগিব”।
আকৌ অখিল গগৈৰ ৰাজপথৰ প্ৰতিবাদ আৰম্ভ হৈছে বুলি তেওঁ দাবী কৰে।
