বিশাল পৰিমাণৰ ধন দাবীৰ গোচৰ গ্ৰেপ্তাৰ হৈছে দুৰ্নীতিৰ বিৰুদ্ধে বৰ বৰ কথা কৈ সোণৰ অসম গঢ়াৰ প্ৰতিশ্ৰুতি দিয়া কৃষক মুক্তি সংগ্ৰাম সমিতিৰ নেতা উমানন্দ মুদৈ মৰাণ।
উল্লেখ্য যে উমানন্দ মুদৈ মৰাণ হৈছে কৃষক মুক্তি সংগ্ৰাম সমিতিৰ কেন্দ্ৰীয় সাংগঠনিক সম্পাদক।
জানিব পৰা মতে, মঙলবাৰে পেঙেৰী আৰক্ষীয়ে কৃষক মুক্তি সংগ্ৰাম সমিতৰ নেতাগৰাকীক গ্ৰেপ্তাৰ কৰে।
কিছুদিন পূৰ্বে সামাজিক মাধ্যমত ভাইৰেল হৈ পৰিছিল উমানন্দ মুদৈ মৰাণৰ এটা বিশেষ কল ৰেকৰ্ডিং। খোদ বিধায়ক সুৰেন ফুকনেও সামাজিক মাধ্যমত শ্বেয়াৰ কৰিছিল ধনবাদীৰ কল ৰেকৰ্ডিং। কল ৰেকৰ্ডিঙৰ তথ্য অনুসৰি, উমানন্দই তালাপত অৱস্থিত এখন চাহ বাগিচাৰ স্বত্বাধিকাৰী দীনদয়াল বাৰ্মাৰ পৰা ২০ লাখ টকা দাবী কৰিছিল। অৱশ্যে বাৰ্মাই ২০ লাখ টকা দিবলৈ সন্মত হোৱা নাছিল। তাকেই লৈয়ে দুয়োৰে মাজত ফোনত চলিছিল দৰদাম। সেই কথোপকথনৰ ভিডিঅ’ই ভাইৰেল হৈ পৰিছিল।
ইয়াৰ পিছতে চাহ ফেক্টৰী স্বত্বাধিকাৰী দীনদয়াল বাৰ্মাই উমানন্দ মুদৈ মৰাণৰ বিৰুদ্ধে এজাহাৰ দাখিল কৰে। ইয়াৰ পিছতে আৰক্ষীয়ে এই এজাহাৰৰ ভিত্তিত উমানন্দক গ্ৰেপ্তাৰ কৰে। এতিয়া প্ৰশ্ন উত্থাপন হয়, এই ফোন কলৰ ৰেকৰ্ডিং ভাইৰেল হৈ পৰাৰ পিছতো কিয় কৃষক মুক্তি সংগ্ৰাম সমিতিয়ে উমানন্দৰ বিৰুদ্ধে একো ব্যৱস্থা গ্ৰহণ কৰা নাছিল?
