কোচ ৰাজবংশী জনগোষ্ঠীক জনজাতিকৰণৰ নামত কেন্দ্ৰীয় চৰকাৰে চৰম প্ৰতাৰণা কৰাৰ অভিযোগত আজি কোকৰাঝাৰত আক্ৰাছুৱে দেশৰ প্ৰধানমন্ত্ৰী, গৃহমন্ত্ৰী আৰু মুখ্যমন্ত্ৰী সৰ্বানন্দ সোণোৱালৰ পুত্তলিকা দাহ কৰে। কোকৰাঝাৰৰ কদমতলাত আক্ৰাছুৰ শতাধিক কৰ্মীয়ে পুত্তলিকা দাহৰ লগতে বিজেপি হায় হায়, সৰ্বানন্দ সোণোৱাল মিছলীয়া, নৰেন্দ্ৰ মোদী হায় হায়, ন’ এছটি ন’ ৰেষ্ট আদি ইত্যাদি ধ্বনিৰে উত্তাল প্ৰতিবাদ সাব্যস্ত কৰে।
পুত্তলিকা দাহ কাৰ্যসূচীৰ পিছতে কোকৰাঝাৰ জিলা আক্ৰাছুৰ সভাপতি কংকণ ৰায়ে কয় যে কোচ ৰাজবংশী সকলৰ জনজাতিকৰণ সন্দৰ্ভত বিজেপি চৰকাৰে কোনো কাৰ্যব্যৱস্থাই নল’লে। বিজেপিয়ে নিৰ্বাচনৰ পূৰ্বে দিয়া প্ৰতিশ্ৰুতি পালন নকৰা তথা প্ৰতাৰণাৰ উত্তৰ আগন্তুক সময়ছোৱাত ভালদৰেই দিয়া হ’ব বুলি মন্তব্য কৰি বিজেপিক কাহানিও বিশ্বাসত ল’ব নোৱাৰি বুলিও মন্তব্য কৰিছে কংকণ ৰায়ে।
