অন্ধ্ৰ প্ৰদেশত একেলগে ২৪ জন মন্ত্ৰীয়ে পদত্যাগ পত্ৰ দাখিল কৰিছে।আজি ৰাজ্যখনৰ গোটেই মন্ত্ৰীসভাখনে পদত্যাগ কৰে। মন্ত্ৰীসকলে মুখ্যমন্ত্ৰী ৱাই এছ জগনমোহন ৰেড্ডীৰ ওচৰলৈ গৈ পদত্যাগ পত্ৰ দাখিল কৰে। এই বিষয়টো লৈ ব্যাপক চৰ্চা আৰম্ভ হৈছে।
বাতৰি অনুসৰি, মুখ্যমন্ত্ৰী জগনমোহন ৰেড্ডীয়ে মন্ত্ৰীসভাৰ ব্যাপক সালসলনি কৰিব বিচাৰিছে। তাৰ পূৰ্বেই বৃহস্পতিবাৰে ২৪জন মন্ত্ৰীয়েই পদত্যাগ পত্ৰ দাখিল কৰে। মন্ত্ৰীসভাৰ বৈঠকৰ পিছতে এইদৰে মন্ত্ৰীসকলে মুখ্যমন্ত্ৰীৰ ওচৰত পদত্যাগ পত্ৰ দাখিল কৰে।
এই বিষয়টোক লৈ ৰাজ্যখনৰ ৰাজ্যপাল বিশ্বভূষণ হৰিচৰণে মুখ্যমন্ত্ৰী জগনমোহন ৰেড্ডীক ৰাজভৱনলৈ মাতি পঠিয়াইছে।
লগতে পঢ়ক: চাপৰত ভয়াবহ পথ দুৰ্ঘটনাত থিতাতে প্ৰাণ গ’ল একে গাওঁৰে তিনি যুৱকৰ, অঞ্চলজুৰি শোকৰ ছাঁ
মন্ত্ৰীসভাখন ভাঙি দি জগনমোহনে নতুনকৈ মন্ত্ৰীসভাখন গঠন কৰিব বুলি সূত্ৰসমূহে জানিবলৈ দিছে। অহা ১১ এপ্ৰিলত নতুন মন্ত্ৰীসভাখনে শপত লোৱাৰ সম্ভাৱনা আছে। সেই অনুসৰি মন্ত্ৰীসভাৰ বৈঠকতে সকলোকে পদত্যাগ কৰিবলৈ কোৱা হৈছিল। বিগত ৩৪ মাহ ধৰি মন্ত্ৰীসকলে কাৰ্যভাৰ চলাই আহিছিল।
উল্লেখ্য যে যোৱা ২০১৯ চনৰ জুন মাহত জগনমোহন ৰেড্ডীয়ে অন্ধ্ৰ প্ৰদেশৰ মুখ্যমন্ত্ৰীৰ আসনত বহিছিল। ৰাজ্যখনত ১৩খন নতুন জিলা গঠনৰ পিছতে মন্ত্ৰীসভাৰ এই সালসলনিৰ বিষয়টোৱে বিশেষ তাৎপৰ্য বহন কৰিছে।
