অসমীয়া ভাষা সংস্কৃতিৰ সাধক চৈয়দ আব্দুল মালিকক বৌদ্ধিক জেহাদী আখ্যা দিয়া হোজাই সমষ্টিৰ শাসকীয় দলৰ বিধায়ক শিলাদিত্য দেৱক গ্ৰেপ্তাৰ দাবী উত্থাপন হৈছে বিভিন্ন মহলৰ পৰা।
সদৌ অসম গৰীয়া-মৰিয়া দেশী জাতীয় পৰিষদেও সাপ্তাহিক লকডাউনৰ মাজতে আজি গুৱাহাটীৰ দীঘলী পুখুৰীৰ পাৰত অৱস্থান ধৰ্মঘট কাৰ্যসূচী পালন কৰি বিধায়কজনক গ্ৰেপ্তাৰৰ দাবী জনায়৷
হাতে হাতে প্লেকাৰ্ড লৈ সংগঠনটোৱে ‘বাংলাদেশৰ পৰা খেদা খাই অহা শিলাদিত্যক গ্ৰেপ্তাৰ কৰক’, শিলাদিত্য হুচিয়াৰ’, ‘অসম চৰকাৰ হায় হায়’, আদি শ্লোগানেৰে উত্তাল কৰি তোলে প্ৰতিবাদস্থলী ৷
প্ৰতিবাদস্থলীত গৰীয়া-মৰিয়া দেশী জাতীয় পৰিষদৰ সভাপতি হাফিজুৰ আহমেদে কয় ‘স্বনাম ধন্য অসমীয়া অসমৰ বৰণ্য সাহিত্যিক চৈয়দ আব্দুল মালিকৰ বিৰুদ্ধে বালংলাদেশৰ পৰা খেদা খাই আহি ইয়াত বিধায়ক হোৱা শিলাদিত্য নামৰ বিধায়ক জনে যি অশোভনীয় মন্তব্য কৰিছে আমি সদৌ অসম গৰীয়া-মৰিয়া দেশী জাতীয় পৰিষদে তাৰ বিৰুদ্ধে ৰাজ্যজুৰি প্ৰতিবাদ কৰাৰ লগতে বিধায়ক গৰাকীক গ্ৰেপ্তাৰ কৰিবলৈ চৰকাক দাবী জনাইছো।’
‘এগৰাকী শাসকীয় দলৰ বিধায়ক হোৱা স্বত্বেও বাৰে বাৰে এনে বিতৰ্কিত মন্তব্যৰে শিলাদিত্যই সাতমপুৰুষীয়া সম্প্ৰতি বিনষ্ট কৰিবলৈ যি প্ৰচেষ্টা অব্যাহত ৰাখিছে তৎসত্বেও এই বিধায়ক গৰাকীক এতিয়াও গ্ৰেপ্তাৰ কৰিব পৰা নাই। চৰকাৰখনে কিয় গ্ৰেপ্তাৰ কৰিব পৰা নাই আমি বুজি পোৱা নাই।’ আহমেদে লগতে কয়।
শিলাদিত্যই মানসিক ভাৰসম্য হেৰুৱাই পেলাইছে বুলি দাবী কৰি তেওঁক তেজপুৰৰ মানসিক চিকিৎসালয়ত ভৰ্তি কৰাৰ লগতে গ্ৰেপ্তাৰৰো দাবী সংগঠনটোৰ৷
অন্যথা অসমৰ ৰাইজে তেওঁক ধৰি বান্ধি বাংলাদেশত থৈ আহিব বুলি মন্তব্য কৰে আহমেদে তীৰ্যক মন্তব্য কৰে সভাপতিগৰাকীয়ে।
