তিৱা স্বায়ত্ত্ব পৰিষদৰ নিৰ্বাচনৰ দিন ঘোষণাৰ পাছতে মৰিগাঁৱত সদৌ তিৱা ছাত্ৰ সন্থা আৰু সহযোগী সংগঠনৰ গণতান্ত্ৰিক আন্দোলন ঘোষণা

সকলো জল্পনা-কল্পনাৰ অৱসান ঘটাই  ইতিমধ্যে ৰাজ্যিক নিৰ্বাচনী আয়োগে তিৱা স্বায়ত্ত পৰিষদৰ নিৰ্বাচনৰ দিন ঘোষণা কৰাৰ পাছতেই সৰৱ হৈ উঠিছে সদৌ তিৱা ছাত্র সন্থাকে ধৰি জনগোষ্ঠীটোৰ আন আন সহযোগী সংগঠন সমূহ।

উল্লেখযোগ্য যে, অসম ৰাজ্যিক ৰাজধানী ক্ষেত্ৰ উন্নয়ন প্ৰাধিকৰণ আইন (ASCRDA), ২০১৭ তিৱা স্বায়ত্ত পৰিষদ এলেকাৰৰ পৰা প্ৰত্যাহাৰ কৰা,অধিসূচনাত বাদ পৰি থকা তিৱা বসতি প্ৰধান ১২৪ খন গাঁও পৰিষদত অন্তভুক্তি কৰি  অবাঞ্চিতভাৱে তিৱা পৰিষদত অন্তভুক্ত হৈ থকা অতিৱা বসতি প্ৰধান গাঁও সমূহ পৰিষদৰ পৰা কৰ্তন কৰা আৰু তিৱা সকলৰ জনপ্ৰিয় আৰু বহু আকাংক্ষিত ষষ্ঠ অনুসূচীভুক্ত স্বায়ত্ত শাসন অতিশীঘ্ৰে প্ৰদানৰ দাবীত যোৱা ২ নৱেম্বৰৰ পৰা তিৱা সংগঠন কেইটাই  এক গণতান্ত্ৰিক আন্দোলন ঘোষণা কৰিছিল।

ইফালে ইয়াৰ মাজতে ৩ নৱেম্বৰত মুখ্য মন্ত্ৰী সৰ্বানন্দ সোণোৱালে উল্লেখিত সমস্যা সমূহৰ ওপৰত এক সৌহাদ্যপূৰ্ণ আলোচনা অনুষ্ঠিত কৰি স্থানীয় মন্ত্ৰী পীয়ুষ হাজৰিকাক জনজাতি আৰু অন্যান্য পিছপৰা শ্ৰেণীৰ কল্যাণ বিভাগৰ মন্ত্ৰী চন্দন ব্ৰহ্মৰ সৈতে আলোচনাৰ মৰ্মে যাৱতীয় সমস্যা সমূহ সমাধানৰ ক্ষেত্ৰত ২১ নৱেম্বৰত মিলিত হবলৈ সিদ্ধান্ত গ্ৰহণ কৰিছিল।

দুৰ্ভাগ্যৰ বিষয় যে, এই আলোচনা নৌহওঁতেই তিৱা সকলৰ কোনো এটা সমস্যা সমাধান নকৰি হঠাৎ ৰাজ্যিক নিৰ্বাচনী আয়োগে  ১৭ নৱেম্বৰ তাৰিখে তিৱা স্বায়ত্ত পৰিষদৰ নিৰ্বাচন ঘোষণা কৰি তিৱা সকলৰ অমিমাংসীত মৌলিক সমস্যা সমূহ সমাধানৰ ক্ষেত্ৰত বৃদ্ধাংগুষ্ঠ প্ৰদৰ্শন কৰা বুলি শুকুৰবাৰে এক সংবাদ মেল যোগে তিৱা সংগঠন কেইটাই অভিযোগ তুলিছে।

সদৌ তিৱা ছাত্র সন্থাৰ মৰিগাঁৱৰ কাৰ্যালয়ত অনুষ্ঠিত সংবাদ মেলখনত উপস্থিত থকা সদৌ তিৱা ছাত্র সন্থা, সদৌ তিৱা মহিলা সন্থা, তিৱা সাংস্কৃতিক সমাজ, সদৌ তিৱা সুৰক্ষা সমিতি, তিৱা যুৱ ছাত্ৰ পৰিষদ আৰু স্বায়ত্ত শাসন দাবী সংগ্ৰামী মঞ্চৰ বিষয়ববীয়া সকলে চৰকাৰৰ এনে মিথ্যাচাৰ,প্ৰতাৰণা আৰু দুমুখীয়া নীতিৰ বিৰুদ্ধে বিষোদগাৰ প্ৰকাশ কৰি এলানি গণতান্ত্ৰিক আন্দোলন ঘোষণা কৰে।

সংগঠন কেইটাই ঘোষণা কৰা অনুসৰি অহা ২৩ নৱেম্বৰৰ পুৱা ৫ বজাৰৰ পৰা মধ্য অসম বন্ধ, ২৬ নৱেম্বৰত পুনৰ পুৱা ৫ বজাৰৰ পৰা ২৪ ঘন্টীয়া মধ্য অসম বন্ধ, ১ ডিচেম্বৰত দিনৰ ১১ বজাৰৰ পৰা নেলী মকৰীয়াত ৰাষ্ট্ৰীয় ঘাই পথ অৱৰোধ আৰু ৫ ডিচেম্বৰৰ পুৱা ৫ বজাৰৰ পৰা ৩৬ ঘন্টীয়া মধ্য অসম বন্ধৰ ঘোষণা কৰে।

এই ঘোষিত কাৰ্যসূচী সমূহৰ উপৰিও পৰৱৰ্তী পৰ্যায়ত অৰ্থনৈতিক অৱৰোধ আৰু ৰেল অৱৰোধৰ দৰে কঠিন কাৰ্যসূচী গ্ৰহণ কৰিব বুলিও চৰকাৰক সংগঠন কেইটাই সকীয়াই দিয়ে।

আনহাতে, তিৱা পৰিষদৰ আইন মতে, ৩৬ সমষ্টি ভিতৰত ২৫ টা সংৰক্ষিত হ’ব লাগে যদিও এই ক্ষেত্ৰত ২৩ টা সমষ্টি সংৰক্ষিত কৰাৰ লগতে সংগঠন কেইটাই সংবাদ মেল যোগে আন বহু বেমেজালিৰ অভিযোগ উত্থাপন কৰে।

তিৱা স্বায়ত্ত পৰিষদ বিৰোধী সিদ্ধান্তক তিৱা সংগঠন কেইটাই গ্ৰহণ নকৰে আৰু ইয়াৰ তীব্ৰ প্ৰতিবাদ কৰাৰ লগতে আইনৰো কাষ চাপিব বুলি সংগঠনটোৰ নেতৃবৃন্দই সংবাদ মেলত সদৰি কৰে।