চাঞ্চল্যকৰ প্ৰদৰ্শনেৰে ভাৰতীয় এথলেটিকছ জগতত খলকনি তুলিছে অসমৰ এগৰাকী প্ৰতিভা সম্পন্ন যুৱ এথলীটে। নাম অম্ব্ৰিকা নাৰ্জাৰী । সকলোৰে অজ্ঞাতে চীন দেশৰ হংকং চহৰত অনুষ্ঠিত হৈ থকা ১৭ অনূৰ্ধ্ব তৃতীয় এছিয়ান য়ুথ এথলেটিকছ চেম্পিয়নশ্বিপৰ লং জাম্প ইভেণ্টত এথলীটগৰাকীয়ে লাভ কৰিছে ব্ৰঞ্জৰ পদক।
ইতিমধ্যে চৰ্চা লাভ কৰা অত্যন্ত প্ৰতিভাশালী এথলীটগৰাকীয়ে প্ৰতিযোগিতাখনৰ লং জাম্পত (৫.৭৩ মিটাৰ) ব্ৰঞ্জৰ পদক অৰ্জন কৰি সমগ্ৰ অসমবাসীকে গৌৰৱান্বিত কৰিছে।
চিৰাং জিলাৰ বিজনীৰ শিলবাৰীৰ দৰিদ্ৰ কৃষক হৰেশ্বৰ নাৰ্জাৰী (হেমংগ নাৰ্জাৰী) আৰু মাতৃ জাউলি নাৰ্জাৰীৰ দ্বিতীয় কন্যা অম্ব্ৰিকা নাৰ্জাৰীৰ এই সাফল্যত জন্মস্থানৰ লগতে চিৰাং জিলাত এক আনন্দময় তথা উল্লাসৰ পৰিৱেশ বিৰাজ কৰিছে।
চিৰাং জিলাৰ এখন ভিতৰুৱা গাঁৱৰ পৰা গৈ এখন আগশাৰীৰ প্ৰতিযোগিতাত পদক জয় কৰাটো কষ্টকৰ আছিল যদিও সেয়া বাস্তৱত পৰিণত কৰাত স্বাভাৱিকতে আনন্দৰ বিষয় বুলি জিলাখনৰ বিভিন্ন দল-সংগঠনে ব্যক্ত কৰে। অম্ব্ৰিকাৰ সাফল্যৰ বাবে এবছুৰ বিজনী আঞ্চলিক সমিতিৰ তৰফৰ পৰা পিতৃ-মাতৃক সম্বৰ্ধনা জ্ঞাপন কৰা হয়।
কোকৰাঝাৰৰ ছাইত প্ৰশিক্ষণ গ্ৰহণৰ সুবিধা লাভ কৰা উচ্চতৰ মাধ্যমিকৰ ছাত্ৰী অম্ব্ৰিকা নাৰ্জাৰীয়ে ইতিমধ্যে ৰাষ্ট্ৰীয় পৰ্যায়ত পাঁচটাকৈ সোণ আৰু এটা ব্ৰঞ্জৰ পদকৰে নিজৰ প্ৰতিভাৰ উমান দি থৈছে।
উল্লেখ্য যে ভাৰতৰ লগতে সমগ্ৰ বিশ্ববাসীক দুৰন্ত গতিৰে আকৰ্ষিত কৰিবলৈ সক্ষম হোৱা অসম কন্যা হিমা দাসৰ পাছত এথলেটিকছ জগতৰ নৱতম চাঞ্চল্য অম্ব্ৰিকা নাৰ্জাৰীয়ে লং জাম্পত এক সুকীয়া স্থান দখল কৰিবলৈ সক্ষম হ’ব বুলি ক্ৰীড়া সমালোচক তথা বিশ্লেষকসকলে ধাৰণা কৰিছে।
