হোলীৰ আনন্দতে অঘটন বৰপেটা চহৰত, ৩ কিশোৰীৰ সলিল সমাধি

হোলীৰ আনন্দৰ মাজতে বৰপেটা চহৰত আজি সংঘটিত হ’ল এক কৰুণ ঘটনা৷

সুৱেৰী (ফাকুৱা) খেলি গা ধুবলৈ যাওঁতে পুখুৰীত পৰি যতিগাঁৱৰ তিনিগৰাকী কিশোৰীৰ সলিল সমাধি ঘটে৷

এটা পৰিয়ালৰ দুগৰাকী আৰু আন এটি পৰিয়ালৰ এগৰাকী কিশোৰীৰ এনে আকস্মিক মৃত্যুৱে অঞ্চলটোত শোকৰ ছাঁ পেলাইছে।

নিহত কিশোৰীকেইগৰাকী হৈছে যতিগাঁও নিবাসী সত্যজিৎ নাথৰ দুই কন্যা ক্ৰমে ৰিতুস্মিতা নাথ আৰু প্ৰীতিৰেখা নাথ আৰু দীনেশ দাসৰ কন্যা মধুস্মিতা দাস।

হোলী খেলি বিয়লি প্ৰায় ২ মান বজাত ঘৰৰ সমীপৰ পুখুৰীত তেওঁলোক গা ধুবলৈ গৈছিল।

অত্যন্ত দ পুখুৰীটোত তিনিওগৰাকী ডুব যায়৷ ঘটনাটো গম পাই স্থানীয় লোকে পুখুৰীত নামি কিশোৰীকেইগৰাকীক উদ্ধাৰ কৰি বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয়লৈ লৈ যায়।

কিন্তু চিকিৎসকে তিনিওগৰাকীকে মৃত বুলি ঘোষণা কৰে৷

অকাল মৃত্যুক আঁকোৱালি লোৱা মধুস্মিতা দাস অসম জাতীয় বিদ্যালয়ৰ দশম শ্ৰেণীৰ ছাত্ৰী৷

আনহাতে ৰিতুস্মিতা নাথ আৰু প্ৰীতিৰেখা নাথ বৰপেটা জুৰোৰাম পাঠক ছোৱালী হাইস্কুলৰ অষ্টম আৰু ষষ্ঠ শ্ৰেণীৰ ছাত্ৰী।