লকডাউন! কৰ’নাৰ আতংক আঁতৰিল; আগৰ দৰেই স্বাভাৱিক মহানগৰীৰ জীৱনযাত্ৰা
তৃতীয় পৰ্য্যায়ৰ লকডাউনৰ আজি দ্বিতীয় দিন। মহানগৰীৰ আজিৰ দিনটোৰ আৰম্ভণিৰ পৰিৱেশ দেখি এনে লাগিছে যেন লকডাউন চলা নাই গুৱাহাটীত। পূৰ্বৰ দৰে যান্ত্ৰিকতা আৰু স্বাভাৱিক ৰূপলৈ ঘূৰি আহিল মহানগৰীৰ পৰিবেশ।
মহানগৰীৰ আজিৰ পুৱাৰ পৰিবেশ আৰু কালিৰ দিনটোৰ পৰিৱেশ দেখি এনে ভাৱ হয় যেন মহামাৰী কৰ’নাৰ আতংক মহানগৰবাসীৰ মাজত নাই।
ৰাজ্যৰ অৰ্থনীতিৰ উন্নয়নৰ কথা চিন্তা কৰি ৰাজ্য চৰকাৰে কিছু পৰিমাণে শিথিল কৰিছিল লকডাউন। ৰাজ্য চৰকাৰৰ নিৰ্দেশ অনুসৰি মুকলি হ’ল দোকান-পোহাৰ আৰু ব্যৱসায়িক প্ৰতিষ্ঠান।
কিন্তু লকডাউনৰ সময়ছোৱাত দোকান-পোহাৰ শাক-পাচলিৰ দোকানত কোনোধৰণৰ সামাজিক ব্যৱধান মানি চলা দেখা নগ’ল। এক মিটাৰ দূৰত্ব বাদেই প্ৰায় গাত গা লগালগিকৈ সামগ্ৰী ক্ৰয় কৰা দেখিবলৈ পোৱা গ’ল। ক’ৰ’না ভাইৰাছৰ ভয়াবহতাৰ প্ৰতি যেন কোনো ভ্ৰুক্ষেপ নাই বহুসংখ্যক মহানগৰীৰ।
পূৰ্বৰ দৰেই লকডাউনৰ মাজতে সহস্ৰাধিক গাড়ীৰ চলাচল দেখিবলৈ পোৱা গ’ল মহানগৰীত। যেন লকডাউনৰ মাজতে ঘূৰি আহিল মহানগৰীৰ পূৰ্বৰ যান্ত্ৰিকতা।
ইপিনে, স্বাস্থ্য মন্ত্ৰী ড০ হিমন্ত বিশ্ব শর্মাই বহুবাৰ জনসাধাৰণক ‘হাতখনেই মেইন, হাতখন চম্ভালি ৰখাটোৱেই আচল কথা’ বুলি সকীয়াই আহিছিল। তাৰ পাছতো মহানগৰীত প্ৰায়সংখ্যক মৎস্য ব্যৱসায়ী আৰু শাক-পাচলি বিক্ৰেতাই মুখত মাস্ক নিপিন্ধাকৈ বা হাতত কোনোধৰণৰ গ্ল’ভছ পৰিধান নকৰাকৈ গ্ৰাহকক মাছ আৰু শাক-পাছলি যোগান ধৰা দেখিবলৈ পোৱা গ’ল।
যদি কেনেবাকৈ ব্যৱসায়ীজন কৰ’নাত আক্ৰান্ত হৈয়ো ধৰা পৰা নাই বা তেওঁৰ দেহত কোনোধৰণৰ লক্ষণে দেখা দিয়া নাই, সেই মাৰাত্মক ভাইৰাছ যদি তেওঁৰ হাতৰ পৰা মাছ বা শাক-পাচলিৰ জৰিয়তে গ্ৰাহকসকলৰ দেহলৈ প্ৰৱেশ কৰে তেন্তে কেনে এক ভয়াবহ অৱস্থাৰ সৃষ্টি হ’ব পাৰে সেয়া আপুনিয়েই কল্পনা কৰক।
উল্লেখযোগ্য যে, লকডাউনৰ সময়ছোৱাত প্ৰধান মন্ত্ৰী নৰেন্দ্ৰ মোদীয়ে দেশবাসীক ঘৰতে থাকি সুৰক্ষিত থাকিবলৈ বাৰেপতি আহ্বান জনাই আহিছিল। বিনা কাৰণত ঘৰৰ পৰা বাহিৰলৈ আহিবলৈ বাৰেপতি মানা কৰি আহিছিল। কিন্তু তাৰ প্ৰতি ভ্ৰুক্ষেপ নাই জনসাধাৰণৰ।
ইপিনে, দেশত ভয়াবহভাৱে বৃদ্ধি পাইছে ক’ৰ’নাৰ সংক্ৰমণ। বৰ্তমানলৈকে ৪৬ হাজাৰতকৈয়ো অধিক লোক ক’ৰ’নাত আক্ৰান্ত হৈছে আৰু কালিৰ দিনটোত সৰ্বাধিক ১৯৫ গৰাকী লোকৰ এই মাৰাত্মক ভাইৰাছে প্ৰাণ লৈছে।
ৰাজ্য চৰকাৰেও কিছু কিছু ক্ষেত্ৰত কিছু পৰিমাণে শিথিলতা আনিছে যদিও জনসাধাৰণ নিজে সজাগ আৰু সচেতন হৈ থাকিব লাগিব, তেতিয়াহে কৰ’নাৰ বিৰুদ্ধে যুঁজখনত জয়ী হ’ব পৰা যাব।